Noeles.net - Informazion ladina Calender

La mostra "Arpejon desmentieda", metuda fora tla Sala “Heilmann” dl Museo Ladin, vegn daurida en lunesc ai 6 de messel 2009 da les 5 domesdì y restarà daverta enfin ai 10 de setember, duc i dis da les 10 a les 12.30 da doman, y da les 3 a les 7 domesdì. Te chesta ocajion vegniràl prejenté l calender dles ativités da d'isté metudes a jì dai Servisc Educatifs dl Museo. Image Hosting by PictureTrail.com

L Museo Ladin de Fascia à l plajei de podei mete fora chest isté na cerna de laours artistics de Damiano Magugliani donés dal artist al Istitut Cultural Ladin y abinés adum tla Mostra “Arpejon desmentieda”. I dessegns, realisés souraldut anter la fin di agn setanta y i agn otanta, tol ite duta la val de Fascia y mostra i detais architetonics particolars conservés tles costruzions tradizionales: tablés, majons, ciantons puech conescius di paisc y momenc dla vita da paur y di artejans lieda al passé. Segns y testimonianzes de na arpejon comuna che bele te chi agn fova do a vegnì desmentieda, destrabonida tl inom dl progres y da la busia de frabiché, ma architeda da la man dl artist ti chedri a penarel che à conservé enfin a encuei n vivour y na frescura che slumina anterfora.
Damiano Magugliani, architet nasciù a Corbetta tl 1929, à passé sovenz sies vacanzes da d’isté te Fascia y Flem, lascian chilò sie cuer per dagnora y cialan de cueie chi valours criés y mantegnus da la vita sćiantiva y savia dla jent da mont.
Tl recordé, con n pue de ironia, de ester deventé blanch dant dal temp per la ira che al à patì tl vedei destrabonì ann per ann sies montes, végnel descrit enscì les rejons de sie laour tla prejentazion dl liber Fassa "Montagna che scompare" (1982, restampa ICL 2005), che tolova ite feter dutes sies operes metudes fora: “... a na moda che l frut de chesta enrescida posse fé nasce te chi che verda via chest patrimone l amour per sie passé, l respet envers chi che é vegnus dant y l liam con chi valours de sia tera che sce ai vegnissa descancelés portassa al suizid dla comunité de Val”.


Vos ne seis nia loghé ite. [ Loghé ite ]