Noeles.net - Informazion ladina Calender

Traslaval 2009: per montes y per valedes
Dai 28 de jugn ai 3 de messel 11eisema edizion dla roda a etapes te Fascia.
La pieda demez dla pruma raida de 8,5 km é veduda dantfora a Ciampestrin con agonisc' y variadours che peia via deberieda. La roda peia su per na cleva nueva de 2 km (de 300 m de deslivel) devers la Val Udai che sarà determinanta, encebeben che l ert da vegnì jupert podessa favorì i plu temerars. Chesta pruma etapa jirà dessegur de uega per se sciaudé i muscui per podei tò pert con suzes a les etapes ti dis do. N panorama da jauzan fajarà da cornisc a chi che ruva sunsom sot al Larsech con na veduda sun l Sela y la pista dl Aloch sot a la Piza dles Undesc y la Piza dles Dodesc. I atlec jirà flincs juvers devers les frazions de Moncion y Ronch, spo devers l paisc de Mazin olàche ai ruvarà, jian do la streda forestala, al travert dla pruma dles 5 raides de Traslaval 2009 a Mazin. En lunesc, ai 29 de jugn, vegniràl cronometré singolarmenter n trat de 6,3 km con pieda demez a enciamps. Chest trat metarà bonamenter n pue sotissoura la classifica dl secont dì. L vencidour de chesta pruma raida sarà ence l prum provisor dla classifica generala. Travert y pieda demez de chesta "raida asvelta" vegnirà metus su a Ciampedel. Ai 30 de jugn devéntela spo plu sfadiousa con la etapa de Soraga, frazion de Moena. An peia demez dal parch fluvial de La Veisc. La raida se destira spo per ben 15 km. Les claupes ertes y stranciouses se ghirarà bendebot de fadia per ruvé enton sunsom, passan per la mont de Palua y dlongia la utia de Pociace, soura 1.700 m de auteza sot la Piza dles Dodesc. Do chest dì sfadious àn sburlé ite n dì de paussa, ai 1 de messel, per se remete per les does raides di dis do. En juebia peien via sun i 11 km dla cuarta etapa a Cianacei, con bendebot de deslivel. La gara conduj tres i bosc soura les frazions de Lorenz y Vera, con l pont plu aut a 1930 m che sporj na bela veduda sun Piz Vernel. Vegnì ju sarà tamben bendebot sfadious.
La ultima etapa dla 11.eisma Traslaval peia via en vender, ai 3 de messel, a Vich, la classica raidona, la medema dles prumes edizions con 14,5 km y soura 700 de deslivel, con l pont plu aut a 2000 m sun l altiplan de Ciampedie, da olàche an à na bela veduda a 360 degrés sun Vich y Poza, l Ciadenac con les Tors dl Vajolet y plu dalonc veiden l Pordoi, la Marmoleda, l Lagorai y l Latemar. La edizion 2009 dla Traslaval se scluj ju da seira. La iscrizion per les 5 etapes costa enfin ai 30 de mei 46 euro, chi che paia ite dedò 56 euro. Deplù informazions pòn lieje do sun la plata internet: www.traslaval.com


Vos ne seis nia loghé ite. [ Loghé ite ]