La pruma ciandeila per “Noeles.net”
Passa 400 articui, duc da podei ciamò lieje do te nost archif
Encuei, 6 de november 2003, complesc Noeles.net 1 n ann. Sce an va a cialé a plata 28 de chest sit veiden ence ciamò l prum articul y i prums tentatifs. Te chest ultim ann onse mudé plu iadesc viesta; i on ence emparé n grumon soura sistems informatics te internet y perchel daràl ca mudazions damprovia ence tl davegnì. Con l forum y la poscibelté de fé comentars ai articui él sté meso ofrì na interazion anter anuzadours y sit. Ence sce al é un di ponc dassen critichés, davia che nia dagnora ne corespon dut a la “bela maniera y al bel stim” y che l autour pò mantegnì l anonimat con n pseudonim, nes pèrel empò un di ponc plu interessanc, perauter ofris da feter duc i media eletronics via internet, perchel nia valch de nuef o fora de uega. Con internet a d’auta velozité “adsl” se giatará dut na sburla inant.
N gran vantaje de chest sistem é chel de podei memorisé sun n spaze do la rata pice duc i articui a na moda de ester tres da garat.
Co vala pa inant? L stroment ne é giut nia complet per cie che reverda la informazion che se ghirassa perdret na redazion stabila che cuei su duc i aspec dla vita; aja che dut l laour é fat sun basa volentara ne sàn nia, ma enfin che al é dantman la vueia y l interes tl grem dla union jìrala.
(0)Al ne me plej nia
(0)2 iadesc liet