Do n valgugn agn de paussa vuel n zacotan de sostegnidours dl sit „noeles.info“ (denant noeles.net) daurì endò, sintian l debujegn de n sit internet interatif ladin che mancia.
L sit noeles.net fova nasciù ti prums agn dl 2000 per ti dé flé al ladin standard scrit. Te chesta forma y sun chest argoment él gnù scrit deseines de articui desche an po dutaorela lieje do tl sit noeles.info, ativan l liam che meina al sit vedl. L sit fova enlaouta lié a la plata ladina sun l Alto Adige y a la Union Scritours Ladins Agacins con a cef siour Berto Videsott (1935-2015), na personalité che se aficé dre truep tl ciamp dla informazion ladina, enlaouta che al fova puech encantourn, ti daurian l troi al ladin dl 1979 tl „Alto Adige“ y defata dedò tles „Dolomiten“ con na rubrica aposta.
A la fin dl 2007, do feter 28 agn de ativité dre viva con cenc de articui de informazion, comentars y polemiches, é la plata ladina sun l Alto Adige gnuda touta demez da la direzion. L sit noeles.info endere, à abú n per de agn de dorada deplú.
L sit nuef sot a www.noeles.info vuel endò ester atif tl spirit de siour Berto Videsott che à operé na vita alalongia tl ciamp dla informazion tresfora tla prospetiva de na Ladinia unida y dagnora ence con n uedl davert a nosc vijins linguistics ti Grijons y tl Friul.
Noeles.info ne se embasta nia l am de ester n sit de cronaca o de informazion tres atuala, davia che al ne é nia na redazion che ti sta do, ma vuel plutost ester/deventé n pont de enconteda virtual per scrive a na maniera direta y asvelta opinions, minonghes y critiches tres contribuc y comentars. Al é samben davert a contribuc te duc i idioms ladins.
L sit nuef é enjigné ca sun la plataforma wordpress che é dret adateda side per computer, zelular che tablet. Al é enscì dlonch saurì daurí y da lieje graficamenter. Al vegn aconsié de crié sun l tablet y zelular na icona tres „add to homescreen“ con chrome per l’avei atira da tó ca sun l desktop. La icona à i colours dla bandiera ladina. L sit gnirá de gre en gre integré con les funzionalités de uega.
(8)Al ne me plej nia
(3)1913 iadesc liet
Siour Berto essa dessegur abù legreza con chesta noela; ala porta inant n ideal per chel che al se à batù sciche n miscionar. Noeles.info ne vuel nia ti fé concorenza ai media ladins tradizionai ma slargé fora i mesi a desposizion di ladins per baraté fora idees te na maniera informala y asvelta. La Ladinia à n gran bujegn de iniziatives dal bas y chest sit ti pita a la jent la poscibelté de dì la sia, zenza condizionamenc da pert dla politica.
Na informazion y na discuscion ledia é l sel dla democrazia ma chesta pò demé se concretisé sce la jent lascia audì sia ousc y sies ghiranzes. Vignun pò dé n pice contribut a chest ideal con n pensier, n comentar, na critica, na proposta. La ousc dla jent ladina é damaneda propi sen che an é tl reformé l Statut de autonomia dl Tentin-Südtirol.