I jeuni chier cunsei pra Edmund Dellago sun l ladin dolomitan
A la redazion ti él ruvé chest comunicat dla GJ de Gherdeina, sotescrit da Simon Moroder che reporton per entier: “La Generazion Jeuna envieia duc i jeuni de Gherdeina a na seira de nfurmazion y discuscion sun l Ladin Dolomitan. Do avei audí vel nfurmazions da pert de n espert, Edmund Dellago, uniral rujná y damandá la minonga di jeuni, cialan sce i miena chesta nueva rujneda ie de utl o no, sce i jeuni la uel, sce l fossa da pert di jeuni l nteres de la mparé o manco. Duc i jeuni ie nviei a uní a dí si minonga n merdi, 25 de merz, da mesa la nuef da seira tla Bar dl Hotel Genziana a Urtijei. La Generazion Jeuna se ncunforta de ve pudei saludé.”
Comentar dla redazion:
I organisadours, la GJ de Gherdeina, benconesciuda per si comunicac entorc, ne vuel nia informé, ma condané, demé enscí pon se splighé che l “espert” cherdé adalerch da la “Generazion joena” sie avisa un di majeri aversars dl ladin standard, ispiradour enlaouta dla “Regula ladina” y che rejonova for de “Kunstsprache”. La zaita “Dolomiten” scrivessa te n tel caje de n “selbsternannter Experte”. La “Generazion joena” de Gherdeina ne à perchel danz nia bria de se aspeté che na tel manifestazion vegne touta su sciche na cossa sceria. Te chest caje éssen messù envié de drec esperc che à loaré per l Spell o valch espert de linguistica. Sce chisc “jeuni” se essa tout dlaorela de jì al convegn soziolinguistich dl Spell a Urtijei éssei abù na bona ocajion de se informé sciche al toca. Nia empermel: sciche la “Regula ladina” enlaouta, se fejei scialdi ridicui con na tel impostazion anti ladin standard sie a livel local che provinzial.
(0)Al ne me plej nia
(0)2 iadesc liet