Les condizions per giaté contribuc dla Union Europea per i pres da ciasa, per i pres da mont, per mené tiers te mont
Per duc i paurs dla Val Badia vegniràl tegnì en sabeda ai 12 de auril 2003 tl salf dles manifestazions a La Val, con scomenciament da les 10.00, n danmesdì de informazion persoura i contribuc de sovenzion per l’agricoltura y la sconanza dl ambient y dla natura. Deplù reladours dles repartizions dla provinzia y dl’Union di Paurs de Südtirol – Bauernbund jirà ite sun i contribuc odus dantfora da la Union Europeica y la Provinzia da Bulsan. Do i referac saràl la poscibelté de fé domandes. L Ofize Parcs Naturai dla Provinzia adum con l’Union di Paurs dla Val Badia envieia dantaldut i paurs, ma ence i autri proprietars de grunc y duc i interessés a tò pert.
Con l ann 1999 él pié via a livel europeich n program de sovenzions per l’agricoltura y l’ambient. Chest regolament conesciù sciche 1257 (ex 2078) contegn deplù sortes de contribuc: contribuc agroambientai (premies ambientales), contribuc per les costruzions rurales, contribuc de compensazion (paiamenc de avaliament) y e.i.
L danmesdì de informazion di 12 de auril a La Val tratarà dantaldut i contribuc agroambientai che à na gran emportanza per l raion dla Val Badia. Al vegnirà perchel porté dant les poscibeltés y les regoles per i contribuc per i pres da ciasa (premies per l vert agricul), per i pres da mont (premies per l mantegniment dla contreda), per conduje tiers te mont (premies per jì a mont) y per tegnì razes de tiers particolares.
Davia che les domandes messarà vegnì prejentedes y renovedes entratant l meis de mei, é chesta iniziativa propi te chest moment na bona ocajion per se informé sun les poscibeltés che un à y sun les regoles che mess vegnì tegnides ite sce an tol pert a chest program de sovenzion. I reladours che vegnirà adalerch da Bulsan laora pro les repartizions dla provinzia y pro l’Union di Paurs de Südtirol y se dà ju propi con l paiament de chisc contribuc.
Per vos rejonarà:
dot. Giampio Dell’Eva Repartizion Agricoltura
dot. Joachim Mulser Repartizion Natura y Contreda
dot. Umberto David Repartizion Forestala
dipl. ing. Michael Crepaz Union di Paurs Südtirol
Lingaz: todesch, anter i paurs é la terminologia plu conesciuda per todesch
L Ofize Parcs Naturai dla Provinzia, l’Union di Paurs dla Val Badia, les repartizions y ofizi competenc envieia duc a tò pert.
Informazions:
Gottfried Nagler
Ofize Parcs Naturai
Senta de servisc Val Badia
Tel. 0474-506120
(0)Al ne me plej nia
(0)2 iadesc liet