N ladin che defen n tort fascist
L ASSESSOUR MUSSNER TI FEJ N GRAN DANN AL INOM DI LADINS, DEFENAN N TORT METÚ A JÍ PER DESFÉ I LADINS
L assessour Florian Mussner podessa jì fé pert dl comité contra-referendum da souramont. Mussner a bracions con Galan. Dessegur vegniràl trat ca con plajei tla stampa beluneisa y taliana, dessegur é contenc duc i defensours dl operat de tripartizion de Mussolini, per sies paroles che al à dit enier sun l jouf dl Sela en gaujion dla enconteda dla Generela. El ne pò nia se imaginé che i confins aministratifs posse vegnì mudés, encuei tl terz milené. An pò ben laoré adum tl ciamp cultural y dla scola, díjel.
I media talians à bele registré con gran plajei i puec entervegnus sun l jouf. Fat él che sot al mandat de Mussner ne él pié via deguna colaborazion, l contrar. Fosc é la colaborazion che el s’imagineia chela che duc se mete a una per saré i joufs y per mete n daz, ajache la tripartizion ne ti basta nia!
Empede ti dé na sburla y encorajé l referendum a souramont, desche l assessour regional ladin Luigi Chiocchetti à fat y fej tresfora, recordan ence fac storics, desche la pruma deliberazion dl Consei Regional dl 1948 tres chela che an se à damané dal stat che al vegne endò tout ite tla region i teritores ladins, ne à per Mussner la storia deguna valuta. Al ti met al referendum rams tles rodes.
L piec é l dann de prestije ai ladins. Mussner fej a inom di ladins na burta figura ti media todesc y talians: n ladin che defen n tort fascist metù su per desfé na etnia, n ladin defen chest operat fascist da enlaouta.
Al me plej
(0)Al ne me plej nia
(0)
(0)Al ne me plej nia(0)2 iadesc liet