Dr. Lois Craffonara: “I à lit sön noeles.net, mo i ne savô nia de nia”
L dr. Lois Craffonara nes à fat avei chesta touta de posizion sun l “IV Colloquium Retoromanistich” che vegnirà tegnù a la fin dl meis de aost a San Denêl tl Friûl. Sie inom figureia anter i reladours, ma el enstes ne é nia gnù contaté enfin a do la publicazion dl program sun noeles.net. Se trátel de na desmentianza dla organisazion tl Friûl o plulere de valch istituzion ladina dl post che ne à nia volù ti dé inant l envit?
de Lois Craffonara
Söl program dl Colloquium Retoromanistich (S. Denêl / Friûl, 26-28 d’aóst), publiché te noeles di 26 de messè, lîi mî inom y le titul de chëra che dess ester mia contribuziun: Presentaziun dl liber „Flus leterares“. Iö ne fajarà degöna presentaziun por chëstes rajuns:
– 1) pro de te’ ocajiuns él usanza che n referënt vëgnes damanè ofizialmënter n valgügn mëisc denant sc’al é a öna de sporje n so contribut, y ël pò fissé le titul de so referat. Chësta usanza é bëgn gnüda respetada pro i atri che à podü se chirì fòra le tema sciöch’ai à orü, mo nia pro mè. Ai 28 de messè lîi sön noeles mî inom etc., scebëgn ch’i ne savô nìa de nìa, y ai 29 me telefonëia la Societât Filologjiche Furlane porvìa dl stè-sura-nöt. Chësta n’é nia coretëza y gnanca cherianza. I ne m’un ess nia amal sc’an ne m’oress nia avëi danter i referënć, mo i ne me lasci nia „remenâ“ ch’an dij por furlan. Porater ài de bones rajuns da dubité ch’al s’ascognes mâ Furlans dô chësc deport (dan da sîs agn m’él capité plü o manco la medema cossa chilò da nos ….);
– 2) i ne jarà mine indô n iade tl Friûl a baié de n liber gnü fòra i pröms mëisc dl 2003 y che é tratan venü fòra da n pez, dô ch’i l’à bele podü presentè ai Furlans l’ann passè tla bela cornisc dl Ciastel de Colorêt, te n’atmosfera da festa y amicala, laprò acompagnada da na ospitalité che mâ i Furlans sa da dè.
dr. Lois Craffonara
dr. Lois Craffonara / Strada Alpini 14 A / 39031-Bornech 03.08.2005
NB. Cun le computer dla biblioteca olach’i scrîi, ne poi nia realisé le –-c- gran cun l’„azënt“; a so post adori porchël l < C > sotlinié.
 Fieste Ladine y IV Colloquium Retoromanistich: program |
(0)Al ne me plej nia
(0)1 iadesc liet