Museum Ladin Ciatel de Tor: relazions publiches

Ence trueps vips storj pro

L diretour dl Museum Ladin Ciastel de Tor, Stefan Planker, dij de ester dret content dla bona colaborazion con i consorzes turistics che ti dá ence valour y peis a la cultura ladina

Enier, juebia ai 31 de merz 2005, à l Museum Ladin abù coche vijitadoura una dles persones dl spetacul plu conesciudes dl moment tla Talia: Michelle Hunziker. Adum a sie compagn y sia muta Aurora é i ghesc’ restés per does ores tl museum, desmostran truep interes per la storia y la cultura ladina. L argoment de chel che ai é restés particolarmenter imprescionés é sté chel dla formazion dles Dolomites. Dal moment che l Museum Ladin ti à plajù dassen, se ái declaré de vegnì a San Martin a vijité l museum ciamò n iade entant l’isté.

Michelle Hunziker, deberieda con sie compagn y sia muta Aurora y amesaite l diretour, Stefan Planker.

“Dret intensives é stedes chesta aisciuda les relazions con i jornalisc'”, dij con sodesfazion l diretour Stefan Planker. Demé en l’edema passeda él stort pro n corespondent dla “Frankfurter Allgemeine”, responsabel dl’informazion culturala da la Talia, jornalisc’ de Canale 5 y n clap de jornalistes americanes, vegnudes adalerch en gaujion dla garejeda de Vips tl’Alta Badia. En gaujion dla manifestazion dl aniversar di 25 agn metuda a jì da l’AUDI a La Ila ova l Museum Ladin enjigné ca material per la stampa per ben setanta jornalisc’.
Anter les truepes ativités dl museum él ence chela de ti sté do y avei relazions con la stampa y i jornalisc’ y per chel garétel gonot jornalisc’ de foliec, ma ence de televijions y radio su dal Ciastel de Tor San Martin. Contac végnel ence tout su tres i Consorzes Turistics dl’Alta Badia y dla Crontour con Al Plan de Mareo y San Martin de Tor. L diretour é perchel dret rengrazient ai consorzes turistics dla bona colaorazion, “ence ajache an veid che ai ti dà truep valour y peis a la cultura ladina”, sciche el dij.

6 iadesc liet