La pruma Trienala Ladina
La comiscion à chirì fora Lois Anvidalfarei, Thea Blaas, Aron Demetz, Gehard Demetz, Walter Moroder y Philipp Messner – Daurida en vender ai 24 de setember da les 18.00 tl Museum Ladin Ciastel de Tor a San Martin
L’idea fova chela de ti dé l meso a artisc’ dla Ladinia de podei mete fora si laours, ma passan dant tres l coul de na comiscion voluda de n livel aut con membri che laora y che é conescius nia demé a livel nazional, ma internazional. Enscì ova l Museum Ladin Ciastel de Tor bele d’aisciuda scrit fora publicamenter l’iniziativa ti dan temp ai artisc’ de enjigné ca n curriculum tres chel che la comiscion à podù valuté y selezioné i artisc’ che pò sen mete fora. Grana é steda la partezipazion, propi davia che al fova na ocajion per i artisc’ de se mostré y ence poester te una o l’autra ocajion de vegnì touc en conscidrazion pro l’esposizion de valch mostra che chisc curadours de mostres met a jì tl’Europa.
Thea Blaas de Urtijei.
I membri dla comiscion che la direzion dl Museum Ladin à contaté, é l dot. Peter Weiermeier diretour dla Galeria d’Arte Moderna de Bologna y curadour de mostres, la dot.a Margrit Brehm dl “Museum der Moderne Salzburg” curadoura de mostres, dot. Alessandro Riva critich d’ert y curadour de mostres anter l’auter dl Italian Factury pro la Bienale de Unieja, Letizia Ragaglia dl Museion de Bulsan, curadoura de mostres y l diretour dl Museum Ladin Stefan Planker.
La comiscion à chirì fora Lois Anvidalfarei, Thea Blaas, Aron Demetz, Gehard Demetz, Walter Moroder y Philipp Messner, ben sies empede de cinch artisc’ coche vedù dantfora. Coche bele splighé tla stampa fova l numer de sies vegnù chirì fora pervia dla bona y dl’auta cualité che duc i partezipanc à pité y la comiscion fova dla minonga che an essa podù nen lascé tò pert n artist deplù respet al numer prevedù. Endut se ova candidé ben 27 artisc’.
Te chesta pruma edizion dla Trienale Ladina é i candidac limités a les valedes de Badia y de Gherdeina, ma pro la seconda edizion, te trei agn, coche bele prejenté tl projet, vegniràl tout ite les autres valedes ladines dles Dolomites y te sies agn vuelen fé na Trienale con duc i artisc’ ladins dles Alpes con l Friul y i Grijons laprò.
La daurida dla mostra sarà en vender ai 24 de setember da les 18.00 tl Museum Ladin Ciastel de Tor a San Martin. La mostra vegn daurida dal President dl Govern Provinzial, l dot. Luis Durnwalder y l’introduzion a la mostra vegnirà fata dal dot. Alessandro Riva che à ence scrit n test de introduzion y da la dot. Letizia Ragaglia. Ence sce nia prejent a la daurida per via de n impegn, ma con na sia vijita segura pòn raté sun la prejenza dl conesciù Onorevole y critich d’ert Vittorio Sgarbi. El vijitarà la mostra plu dessegur entourn ai 10 de otober. Pervia de impegns de laour ne podarà purtruep nia ester prejenc Peter Weiermeier y Margrit Brehm.
L Museum Ladin Ciastel de Tor envieia duc canc a tò pert a la daurida de chesta mostra che dess ester sen y tl davegnì n apuntament emportant per i artisc’ ladins con l meso de podei se mostré sun l scenar artistich internazional.
(0)Al ne me plej nia
(0)2 iadesc liet