Richard Agreiter y l “Mister dla forma”
La Ministra dl’Austria Benita Ferrero Waldner enaudará l’esposizion, ai 16 de messel da les 18.00 tl Museum Ladin Ciastel de Tor – Prejent ence Durnwalder y Hosp y en valgugn vips politics
“Anter i artisć d’aldidancuei tol ite Richard Agreiter n post particolar. Sies scultures de bron gareta deplen te sie ambient creatif y chest tl dret sens dla parola.” (Dot.a Sylvia Mader, storica dl’ert, Dispruch) Con chest pensier sotrisseia la studiousa l fat che l’artist ne fej nia demé l dessegn, la proa de ghips o l model 1:1, sciche al vegn scialdi dagnora fat da laoré tl bron. Richard Agreiter cola ence enstes sies scultures a Steinberg am Rofan (Tirol). Ales nasc da el enstes per entier. Richard Agreiter, nasciù dl 1941, vegn da na vedla familia ladina dla Val Badia, plu avisa de Fornela a Antermeia (sen luech dl Cheder), che à lascé sie paisc entratant la opzion dl 1939 y é ruveda a Steinberg am Rofan tl’Austria. Entrami i genitours fova Ladins, el enstes é nasciù dlafora, conzepì él gnù tla Ladinia y sun chest tégnel dret dassen.
Richard Agreiter entratant che al cola bron.
Al à metù man si studes artistics a Dispruch, al é spo jù tla Svizra y à a la fin sclut ju l’Academia dles Beles Ertes a Bruxelles con les mioures notes. Encuei él artist y scultour lede.
Sie curriculum é dret interessant y conta su deplù mostres y compartezipazions tl’Austria, ti Paisc Todesc, tla Talia, tl Luxemburg, tl Belje y tla Svizra. Agreiter conesc ence jent dret alangrana, à pu personajes sciche Andreas Khol (President dl Parlament Austriach), Günther Platter (Minister dla defendura dl’Austria), Bernhard Vogel (Ex Prum Minister te n Land todesch), Wolfgang Schüssel (Canzelier dl’Austria) y Franz Fischler (Comissar UE per l’agricoltura) prejenté si catalogs dles ultimes mostres.
En onour de sies raijes ladines met sen fora Richard Agreiter sies scultures y si reliefs tl Museum Ladin Ciastel de Tor, con l titul:
“MISTER DLA FORMA”
Daurida en venders, ai 16 de messel 2004, da les 18.00, Museum Ladin Ciastel de Tor. La Ministra per afars foradecá dl’Austria, signoura Benita Ferrero-Waldner daurirà ofizialmenter la mostra.
Diego Clara
Program:
- Salut dl dot. Bruno Hosp, president di Museums Provinziai de Südtirol
- Salut dl’Assessoura provinziala dot.a Sabina Kasslatter-Mur y dl Assessour provinzial dot. Florian Mussner
- Descurs dl President dla Jonta Provinziala de Bulsan, dot. Luis Durnwalder
- Descurs dla dot.a Benita Ferrero-Waldner, Minister afars foresć dl’Austria
- Relazion dl Mag. Günther Moschig, storich dl’ert y curadour de mostres
- Salut dl artist enstes, Richard Agreiter
La mostra gnirà enaudeda ofizialmenter dal Minister Signoura dot.a Benita Ferrero-Waldner. Orars de daurida: dal 16.07 ai 22 de aost 2004: dal mertesc a la sabeda, da les 10.00 ales 18.00, domenia, da les 14.00 a les 18.00, de lunesc sclut (ls:if)
(0)Al ne me plej nia
(0)1 iadesc liet