Duc a una contra n daz sun i joufs
Lista LADINS ence a una de sostegnì n referendum per cie che reverda n daz sun i joufs dolomitics
La neif y les burtes stredes ne à nia sprigolé la jent che é ruveda da Gherdeina, Badia y Bulsan a la reunion anuala dl M.P. LADINS dan a Sëlva. L vizepresident Trebo Hans y l coordinadour Lois Castlunger à podú saludé na bela cumpeida de prejenc analisan daldò la situazion dl moviment.
Ei à messú sostituí l president Heinrich Demet che se ova fat mel l di dant. „ L movimënt cresc bel plan, ma al à debujegn de na organisazion plu sterscia y de n gran sostegn. Pro les proscimes lites provinziales voléssen ester enjignés da sté a la pert. Al va debujegn de chirì plu contat con les autres forzes politiches, dantaldut con i partis y i movimenc autonoms ladins, per fé na politica ladina unitara.“Chest à sotrissé i reladours particolarmenter. I raporc con la UAL é bogn, ma la SVP à schivé l contat pro na meisa torona organiseda aposta da da auton a la Ila. La majera discuscion él vegnù fat sun la chestion dl daz sun i joufs y endut sun i coliamenc anter i ladins. Do che l assessour Pezzei de Corvara à splighé sia posizion y dl consei de comun se desmostran n pue plu „possibilist“ à plu persones sotrissé la ingiustizia y l puech utl , scenó dann che la scluta o l daz di joufs podessa comporté per la jent che viv entourn l Sela via. A la fin fin vegnissa la speisa a pesé sun la jent dl post y les entredes per l curt temp da d’isté fossa ben mendres de coche an miena. Ma l paiament de na couta per la streda ne passeneia nia ite tl sistem dles coutes talianes, bele autes assé y nience tl sistem dl bilanz provinzial che á mesi assé per cialé diretamenter dles stredes. A deguna maniera ne fòssel giustifiché fe paié n daz sun joufs ai aciasés dles valedes ladines. Enscì à la assemblea aprové na ressoluzion, duc a una, contra l daz sun i joufs fajan y sostegnan deplù propostes alternatives per smendrí l trafich tles valedes y ti paisc. L M.P. LADINS é ence a una de sostegní n referendum sun chesta chestion. Plu argomenc che reverda i comuns é vegnus tratés tla discuscion, coche la ICI, l personal, la colaborazion anter i comuns. L tema plu politich à toché la reforma litala per l parlament olache l scialier dl 20% per la Ciamena di deputés, a livel regional y per partis che raprejenteia mendranzes é clermenter fat per la SVP y scluj fora i ladins coche organisazion politica y coche mendranza.Cler él che la SVP enstessa ne podarà ence nia se prejenté coche partí raprejentant dla mendranza ladina con l 90 y passa % de todesc. La reunion é vegnuda scluta via en compagnia.

![]() |


2 iadesc liet