Ert sa mont, depenje y dessegné alaut
La fopa plajoula de Fuciada / Soraga deventarà per doi dis na dreta fujina de artisc’
Ert sa mont per chirì chela ispiraziony chela vejinanza al bel dla natura che an pò porté dant demé a chesta vida. Tres chest spirit y con chesta gran vueia de ert é l Zircul cultural Valentino Rovisi de Moena do a endrezé via y fé conesce na bela scomenciadiva dal titul “Art sa mont – estemporanea de pittura in quota” che an tegnirà sun la mont de Fuciada dai 7 ai 9 de messel 2006.
Tres chesta scomenciadiva vuel l zircul Rovisi abiné adum n bel clap de artisc’ che te trei dis de ert sa mont cognarà porté dant y crié operes che ae desche soget la bela arpejon naturala de Fuciada, si tablés y dut sie ambient entournvia. Dessegur sarà la bela mont de Soraga, chela de Fuciada, fontana de ispirazion per i artisc’ che tolarà pert a chesta scomenciadiva daverta a duc i artisc’ interessés. La senta operativa de duta la scomenciadiva é logheda tla Utia Fuciade y bele da doman abonora saràl na comiscion aposta che fajarà la timbradura dles teiles a na vida che dut sie fat tl maiour respet dles regoles dl concurs. La fopa plajoula de Fuciada deventarà a chesta vida per doi dis na dreta fujina de artisc’ che dessegnerà y depenjerà con gaissa y con pascion les belezes de n paraisc da mont. Do i doi dis gnirà les operes metudes fora per dut l’isté- enfin ai 19 de setember, tla utia de Fuciada y te n valgunes uties entournvia. Per l concurs él prevedù ence prems per les does catogories metudes su aldò y la premiazion di vencedours vegnirà fata en domenia, ai 9 de messel, tla utia Fuciade con na bela festa alalergia endrezeda per duta la jent che ruvarà adalerch. Deplù informazions pòn avei dal zircul Valentino Rovisi de Moena y da sie president Claudio Vanzo. Domenico Volcan. (http://www.circolorovisi.com)
Al me plej
(0)Al ne me plej nia
(0)
(0)Al ne me plej nia(0)1 iadesc liet