Michil Costa: “I preie perdonanza”
- Costa: “Ie ne rate nò me, nò membri dla lista LADINS talebans o fondamentalisc'”
La parola “taleban” é tomeda y Costa Michil preia sen perdonanza. Encuei (17.06) á la Tageszeitung publiché la retifica a sia intervista de en sabeda (11.06) sun l medem foliet. Michil Costa: “Per me él emportant de sclarí che ie ne é fat deguna corelazion anter la cultura ladina, la lista LADINS y i talebans, l contrar, ie ti sé gré a duc chi che á laoré con gran pascion, volontaramenter y zenza sconé bries per la gauja ladina. Sce valch Ladin se á sentí ofenú da mies paroles tla intervista, sonsi enjigné da prié perdonanza. I ladins y l lingaz ladin me sta a cuer y mia enciaria desche president dla Union Generela di Ladins dles Dolomites é per me na onour y na oblianza.”
Al jornalist, Florian Kronblicher, ti atesteia Costa coreteza y profescionalité tla reproduzion de sia intervista y da l’autra pert che al “essa endere fosc messú vegní formulé miec la frasa che á condut a les melinterpretazions”. Michil Costa: “Ie ne rate nò me, nò membri dla lista LADINS talebans o fondamentalisc’, chest volessi dí clermenter”.
L jornalist Florian Kronbichler á reconfermé sun domanda che les frases é vegnudes dites tl significat desche al é scrit tla intervista tla Tageszeitung di 11.06.05. Al é tomé chela parola.
La terminlogia: “talebans” o “fondamentalist”, ne é nia adateda y nia-azetabla te n dialogh cultural, politich y ideologich davert. Condutes les spligazions réstel na saour ajia y l debujegn de savei cie motivazions che al é sté viadedò. (is)
Al me plej
(0)Al ne me plej nia
(0)
(0)Al ne me plej nia(0)1 iadesc liet