Na schira de manifestazions per daidé i “mutons” che ne à nia l muet
Cultura y folclor da vender 5 al 8 dezember tla Val de Fascia
de Chiocchetti Marta
La val de Fascia à l privilegh de scluje ju l ultim meis dl ann con na scomenciadiva de gran valuta culturala, etica y turistica. En ocajion dla festa de San Miculau, da dagnora sentuda y festejeda te nost raion y che respon a na tradizion longia, él vegnù endrezé via cater dis de festa, cultura y folclor da vender 5 a lunesc 8 dezember, con na lingia de manifestazions dutes liedes anter eles da n tema soul: l mut y sie dert de cresce su te n contest sann y che tegn cont de sia natura.
Al se trata de manifestazions che sostegn l projet ambizious dla UNICEF “Colombia: mutans y mutons costrutours de pesc”. Al é con chest spirit che la comunanza de nosta val i dà alberch ai mutons tl “Vilage SOS de Trent” y a 8000 che vegnirà ti proscims agn da la Colombia. Na lotaria a pesc’ abinarà su i mesi finanziars de uega per podei sostegnì les speises dl projet, prum tla Talia. Al ti garantiarà a chisc mutons l plen reconesciment di bujegns primars, de vive en pesc y de ester ei i protagonisc’ de n mond de pesc. L certl de manifestazions peia via con l concurs ‘Na letra a San Miculau’. Al ti vegnirà dé l pest al laour plu senzier y original da n grup de esperc vidé dal scritour Mario Rigoni Stern. Nia da perde l apuntament che veid protagonisc’ valgugn di mutons che a tout pert al “Zecchino d’Oro” y che darà la ocajion de scuté su ciamò na outa Martina Iori da Delba che à arjont l terz post. Dutes les manifestazions dal conzert di “Pavei d’arjent” al conzert di mutons dl Conservatore de Bulsan enfin ai artisc’ del Circus dla Francia sostegn l projet dla UNICEF. Entratant duc i cater dis vegniràl tegnì “L Marcé da Nadel”. La Val de Fascia arà l muet de se fé conesce y apriejé tres chest marcé sot n grum de ponc de veduda. Nosta tradizion gastronomica y de ciadadafuech, nosc luriers artistics, i vins, les sgnapes de nosta region y auter plu. La Val de Fascia che la festa garete. Ala à dutes les chertes per arjonje de biei resultac. La comunanza à responù dalvers a les proponudes y l comité che à endrezé via é sté content de chest spirit positif di boteghiers, di hoteliers y di laoranc che se à metù a la leta te vigni setour per daidé. Chesta é ence na “vertola” per sporje na mioura paruda dla Val de Fascia deforavia. La potenzialités dla valeda é truepes. Natura y de beliscims paesajes, luesc de turism, poscibeltés y raporc interculturai y internazionai dess ester la sburla per nes fé recordé che al é jent che ne à nia dut chel che nos cherdon che sie dovù. E chi che arà la fortuna de avei tla man l numer vencedour pò dì de avei venciù does outes. Per se enstes y per i mutons dla Colombia.
(0)Al ne me plej nia
(0)2 iadesc liet