Lites provinziales a Belun: Daniela Templari ti la fej

Daniela Templari ruva te consei tla provinzia de Belun

Ala portarà inant la chestion dl referendum – Chesta domenia, 21 de jugn, balotaje per la presidenza anter Sergio Reolon (PD) y Gianpaolo Bottacin (Lega Nord) 

Daniela Templari, candidata sun la lista zivica LDP (Lista Locale Ldp Bottacin Federalismo Dolomiti che à abiné adum 5.672 oujes, 624 o l 16,99% de chestes tl coleje lital de Ampez-Fodom y Col), lieda a la Lega Nord pro les lites provinziales di 6-7 de jugn a Belun, jirà te consei y raprejentarà dantaldut i ladins di trei comuns da souramont y sia gauja referendara. Chesta domenia, 21 de jugn, végnel lité a Belun na seconda outa l president, do che pro la pruma roda ne ova degun candidat arjont la maioranza assoluta. Al balotaje é ruvés l president en ciaria, Sergio Reolon dla lianza de manciancia, con l 41,2% dles oujes y Gianpaolo Bottacin (Lega Nord), candidat dla lianza de mandreta con l 47,1%. L zenter-dreta davagna autafora a Ampez-Fodom-Col con l 69% dles oujes.

Daniela Templari, da Fodom, fova ativista en pruma lingia pro l referendum dl 2007

Daniela Templari: “Emprumadedut vuei dì n bel develpaie a duta chela jent che me à dé la creta y che crei che i son bona de porté inant l iter dl referendum.” Con la lita de Daniela Templari arjonj l comité referendar n prum gran obietif, chel de avei na ousc tl consei provinzial de Belun. Sen trémolen endere ciamò per l balotaje. Sce Gianpaolo Bottacin tol la venta, fajessa Daniela Templari automaticamenter pert dla maioranza, n vantaje envers a ester pro la oposizion. Les poscibeltés someia de ester bendebot granes che al entravegne na muda de govern tla provinzia de Belun. La repartizion dles oujes pòn vedei sun chest sit Resultac tl coleje lital de Ampez-Fodom-Col

.

Al me plej(0)Al ne me plej nia(0)

2 iadesc liet

Ortiede inant tres