Invit ai Furlans de lité Bepe Detomas
Bepe Detomas al è il candidât di ducj i Ladins
Udin – Cu la presentazion des listis dai candidâts dentri il cinc di mai stât e je scomeçade uficialmentri la campagne eletorâl pes votazions europeanis. Diviers i candidâts de Regjon Friûl-V.J. presints tal colegjo dal Nord-Est (Friûl-V.J. , Venit, Trentin-Sud Tirôl e Emilie Romagne). Il centri-çampe al presente la gnovitât de liste “Uniti nell’Ulivo”, prudelade dal president de Comission europeane, Romano Prodi. Tal Nord-Est la liste ‘e à come capoliste Enrico Letta. Tra i candidâts di chenti o cjatìn il secretari regjonâl dai Ds, Carlo Pegorer. Par Rifondazion Cumuniste (che si presente par cont so) il candidât di ponte al è invezit l’assessôr regjonâl Antonaz.
Articul sourantout dal sit: http://www.ladinsdalfriul.org, publiché sun l’edizion de jugn dl mensil ” LADINS dal FRIUL”
Di chê âtre bande, a drete, Forza Italia, oltri a Renato Brunetta, o cjatìn la paluçane olimpioniche di ski Manuela di Centa. Chei di Alleanza Nazionale a pòntin impen su Dressi e sul sindic di Tarvis Baritussio, mentri la Lega Nord e fâs cont rivâ a mandâ a Bruxelles il parlamentâr e sindic di Cjampfuarmit, Pieri Fontanini. Di segnalâ ancje la presince de “Lega per l’autonomia” (de passionarie tirolese Eva Klotz), e de Südtiroler Volkspartei che chenti e presente il sloven Drago Stoka.
Dutcâs la gnovitât plui grande di chestis votazions e je cence âtri la presince di un candidât ladin, il parlamentâr Giuseppe (Bepe) Detomas espression da l’Union Autonomiste Ladine de Val di Fasse , zà deputât te XIII legjsladure e tornât a elezi te circoscrizion “Pergine-Valsugana” te Liste de Margherita colegade cu la Südtiroler Volkspartei . Al è iscrìt tal grup parlamentâr “Misto – Minoranze Linguistiche” e al fâs part di plusôrs comissions. Avocàt di 41 agns, Detomas pes elezions europeanis dai 12 e 13 di jugn cu ven al è presint te liste de “Margherita” ossei te liste “Uniti nell’Ulivo”. In pratiche al rapresente ducj i Ladins des Dolomitis, ossei chei des provinciis di Trent, Bolsàn, Belùn, e chei de provinciis ladinis dal Friûl di Udin, Gurize e Pordenon. O crodìn ch’e sedi cheste une grande ocasion par manifestâ in maniere concrete ch’e esist une unitât ladine, oltri i leams culturâi e lenghistics. Rivâ a mandâ un ladin a Bruxelles a rapresentâ dutis lis ints ladinis e sarès une grande vitorie, magari il pont di partence di une trate denant trat impensade, une trate che dome i idealiscj e patreots de ladinitât come Achîl Tellini, Josef Marchèt, Felix Marchi, Fausto Schiavi, Riedo Puppo, Celso Macor, Francesc Placerean, Etalrêt Pascolo e l’inmò vivìnt Zuanfranc D’Aronco a son stâts bogns d’inmaginâ.
Duncje cheste volte o vìn une grande ocasion par votâ, al difûr des trainis partitichis talianis, “il nestri candidât ladin” in mût che i Ladins, “Popul d’Europe”, a rìvin a mandâ tal Parlament european la rapresentance ch’a mèrtin di vê.
La redazion di “Ladins dal Friûl”
(0)Al ne me plej nia
(0)2 iadesc liet