Te comun vàla demé con na lista Ladins
Desplajei per l comportament de Mussner, dla provinzia y dl IPES en cont dla ciasa per i ladins a Bulsan
Al ne é nia d’autres alternatives che mete su na lista Ladins per les lites de comun a Bulsan ai 6 de november 2005. A chesta conclujion ésen ruvés enseira pro l’enconteda metuda a jí da la Comunanza Ladina, da la Consulta ladina y dai Agacins che à cherdé ite la jent ladina a Bulsan. Nia trueps à responù al envit, ma la determinazion de mete en pe la lista LADINS é dant man. A jí sun d’autres listes desche da d’aisciuda vàn sot. En lunesc vegniràl sclarí i detais: finanziament y numer de candidac, 6 segurs enfin a sen. L Consei de Comun de Bulsan. I Ladins ciafia demé de jí ite sce ai é unis.
N problem da brancé ite atira é la Ciasa alberch per i ladins. Dassen desplajus ésen con Mussner y la provinzia che “ti à trat dla man la ciasa alberch” per studenc y laoranc che vegn da les valedes ladines. La lista Ladins ti é steda do y se à festidié de dut dal 1995 inant y à tres mené do, prospetan che la Ciasa ne deventassa nia demé n alberch, ma ence na sort de zenter sozial per i ladins a Bulsan, manejé da na assoziazion. La provinzia de Bulsan y l IPES ne ti à endere sen nia plu sourandé la gestion a na assoziazion desche la lege dà pro y desche la Consulta ova proponù y ova giaté assegurazions. “Ai ne vuel nia la dé fora dles mans”, dij l comerzialist De Bertol che ti é sté do a les pratiches. Chest significheia dantaldut che la provinzia y l IPES dá dant i criters per giaté n alberch tla ciasa y chisc vegn ratés massa restritifs da la Consulta Ladina per cie che reverda l davagn (enfin a la 2. fascia, la Consulta volova deslarié l lim a la 3. fascia de davagn) y ence aja che al vegn sclut fora categoricamenter i ladins da souramont. Ala podessa suzede l IPES mete ite tlafineda ence nia-ladins, sce i criters é massa restritifs, te na ciasa fata su con n credit che la Lista LADINS ova individué tl ciamp dla edilizia slisireda a ben dl grup ladin.
(0)Al ne me plej nia
(0)2 iadesc liet