Les trei unions dla zité cherda a l’unité per les lites de comun
En juebia, ai 15 de setember da les 18.30 tl Rainerum, entreda str. di Capuzineri, enconteda generala di ladins a Bulsan
La presidenta dla Consulta per i problems di ladins tl comun da Bulsan, Dolores Dariz, l president dla Comunanza ladina a Bulsan, Ivan Lezuo, y l president dla Union scritours ladins “Agacìns” (con scagn a Bulsan), Berto Videsott, é dassen sperdus de coche ala va inant la storia dla Ciasa-alberch per studenc y lauranc ladins. La Ciasa é fata, ma ala manacia de ne toché nia plu ai ladins, tantes é les clausoles y condizions metudes souraldut da la Provinzia.
Do dutes les empermetudes da pert dla Franzelin, manacia sen de tomé dut cant. Tla Ciasa pò demé ite gherdeines y badioc, scluc fora fascians, fodoms y ampezans, sce al ne vegn nia fat na derogazion (ezezion al decret aprové da la Jonta) y Durnwalder à bele dit de “no”. Al conta ence truep l livel dl davagn de chi che fej domanda per giaté en post. Les condizions toutes en conscidrazion per i extracomunitars é cotant demanco, ajache ai ne n’à nia l dovier dla declarazion.
Al é ora de nes fé audì y perchel vegn cherdeda ite duta la comunité ladina dla zité da Bulsan per in juebia seira, ai 15 de setember, tl Rainerum (con poscibelté de parché – entreda da via di capuzineri) da les 18.30, per zirca naL ora de discuscion sun les iniziatives da tò per nes defene. L dr. Debertol Riccardo, comerzialist, che da agn sta do al problem dla Ciasa nes contarà la problematica.
En gaujion dla abineda vegniràl ence metù sun meisa la chestion de na lista autonoma di ladins, che tole ite dutes les ales (“corentes”) dla popolazion ladina a Bulsan (na sort de “Sammelpartei” partit de racoiuda) per les lites comunales de november. Ence te chest vers manacia i ladins dla zité de Bulsan de resté endò y de vegnì surpassés dai extracomunitars. I ne podon nia nes spidicé su anter plu partis, ajache enscì (les ultims lites l’ à desmostré) ne aronse mai plu n raprejentant te comun. Perchel messonse tegnì adum y jì deberieda. Te chesta ocajion vegniràl ence prejenté i candidac nuefs y chirì souraldut colaboradours per realisé les lites. Al sarà interessant audì propostes. Talians y todesc se muev dassen y nos ne podon nia demé sté a cialé pro y sourandé ai autri nost destin. Chesta é propi la maniera per perde la creta da pert de talians y todesc. N nost raprejentant te comun é na cossa fondamentala. Perchel, preibel, vegnide a la senteda y dijede vosta minonga. Tolede con Vos ence vosc joegn per i sensibilisé ai problems di ladins.
N bel salut y a se vedei dai trei presidenc dles trei Unions:
Bulsan, ai 8 de setember 2005
Dolores Dariz – Consulta per i problems Ladins
Ivan Lezuo – Comunanza Ladina
Berto Videsott -Agacìns
(0)Al ne me plej nia
(0)3 iadesc liet