“Fé con duc unfat y laoré adum”
La lista “SVP” de La Pli de Mareo: si candidac y sie program – Dr. Felix Ploner per la enciaria da ombolt
A La Pli de Mareo se met a la lita, dlongia na lista de paisc, na lista de partí dla “SVP”, la soula partitica te dut l comun, con a cef dr. Felix Ploner, 35 agn, che é sie candidat a ombolt. El á bele esperienza desche aconsiadour comunal tla ultima legislatura y fova y é atif te desvalifs grems politics y te unions dl paisc, anter l auter pro la musiga. De profescion él ensegnant, ma te sie temp lede se dedicheiel con pascion al zidlé eves y al é president dl marcé di paurs.
Les listes che essa interes de mete si candidac y sie program sun noeles.net é priedes de nes i ortié. La publicazion é debant.
PREJENTAZION DLA LISTA SVP TL COMUN DE MAREO
La Lista SVP se prejenta tl comun de Mareo con 1 n candidat per l’enciaria da ombolt, tla persona dal dr. Ploner Felix y 14 candidac a l’enciaria da aconsiadours:Nost candidat da ombolt é n joen con esperienza y al vuel ester trasparent, informatif, efizient y damprò da la jent.
Sie moto: „Ie dije cie che i feje y i feje cie che i dije“
Dr. PLONER FELIX
- 35 agn, maridé, 3 mutons
- Laureé te economia aziendala, université a Dispruch
- Ensegnant de conc, scienzes y informatica tla mesana a Al Plan
- 23 agn trombeta pro la mujiga dla Plì,
- Apicoltur y president dal marcé dai paurs,
- Esperienza da jugadour y alenadour pro chi dal palé,
- 3 agn vize sourastant di joegn tla SVP de Südtirol a livel provinzial
- 5 agn aconsiadour tl comun de Mareo y tla comunité de Puster
- Colaboradour lede de foliec desvalifs
- Autour dl liber 100 agn mujiga de La Pli, 1895—1995
Ploner Felix
Erlacher Richard
Complojer Giovanni (Jonson)
Rigo Agata
Pedevilla Paul (Postin)
Agreiter Helmuth
Morlang Franz
Trebo Manfred
Facchini Heinrich
Rigo Marta
Kehrer Stephan
Maneschg Reinhard
Rovara Guido
Feichter Günther
Nost moto: „Fé con duc unfat y laoré adum”
PROGRAM DLA LISTA SVP 2005 – 2010
1. Na aministrazion per la popolazion
La SVP é per na aministrazion efizienta, daverta a les zitadines y ai zitadins, da capì per duc, clera y trasparenta te vigni sia forma.
La SVP é per:
na plata INTERNET dl comun- n miour funzionament dl ofize tecnich
- n miour servisc per la jent
- na mioura informazion ai zitadins
- mioré l renom dl comun
- na reorganisazion dles competenzes di assessours
- mete da na pert i vantajes personai, al ben dal interes general
2. La familia tl zenter dla politica
La familia é la fondamenta de nosta sozieté y de nost comun. Na sozieté zenza mutons che vegn docà n’à degun davegnì; perchel mess la familia gnì defenuda te na maniera particolara da dutes les persones responsables te comun.
La SVP é per:
- n arbassament dla ICI
- daidé les families con plu mutons con na reduzion de coutes, p.e. refudam, eghes pazes, scolina
- l dert a la pruma ciasa
- zones per l fabriché alesiré
- n register dles unités convenzionedes
- daidé la jent atempeda a mioré sia cualité de vita
- strutures de devertiment per nosc joegn
3. Nosta tera nes adora
La patria y la tradizion cherieia identité y enscì la condizion per ester senziers, daverc, segurs de sé enstesc.
Nos, jent ladina, tegnon truep sun i valours cristians y i son liés a les tradizions ladines, nes ghiron a livel comunal y local n empegn zenza reserva te dutes les chestions che reverda l lingaz, la formazion, la scola, la cultura y les usanzes. Nost lingaz dla oma mess vegnì defenù ence a livel de comun y sia adoranza à da vegnì promovuda. L lingaz y la cultura renforza la coscienza de sé y l’identité de vigni persona singula y dla comunité.
La SVP é per:
- desmostré nosta storia y nostes raijes
- n ampliament dl program cultural te nost paisc
- per finanziamenc a les unions culturales y de emergenza
- fé conesce l paisc desche prum paisc dla valeda sot forma de n liber y de n pice museum
- manifestazions culturales – economiches ence a La Pli
4. Mioré la cualité de vita y mantegnì l ambient
Un di doveis plu emportanc per nos é chel de mantegnì n ambient san; chest vuel dì conservé nosc teritore, la natura y la contreda desche richezes naturales y che nes dà enscì la condizion prinzipala per l svilup economich de Mareo.
L ambient de vita che i nes partion mess vegnì mantegnì y svilupé per duta la popolazion, per les families, les mutans y i mutons, les persones atempedes y les persones plu debles dla sozieté.
La SVP é per:
- l mantegniment dla contreda
- na dreta infrastrutura che lascia vive ben ence tles viles
- n sostegn ai paurs y sie laour
- na reduzion dles ones magnetiches y antenes
- l sposté les ciases dal strom fora dal zenter abitatif
- reduzion dal cioment
- finanziamenc a les enteressenzes da l’ega y a les montes
- l miorament dla cualité de vita
- n svilup economich san
5. Laour, economia y formazion
Na fondamenta economica sana é la basa de na comunité che à suzes. L comun é nosta ciasa, sc’al ti pieta a la popolazion aciaseda da laour, segureza y svilup.
La SVP é per:
- l fabriché alesiré tles frazions y tles viles
- na politica de priesc adegueda
- sostegnì la economia
- l turism, i artejans y i laoranc
- contra vene fora l paisc
- unités abitatives per jent atempeda
- ativités y infrastrutures dal temp lede
- n post de laour segur
- poscibeltés d’abitazion
- refornimenc locai funzionanc
- poscibeltés de svilup per les persones singules y per i grups
- aziendes stersces
- strutures economiches modernes
- prestazions soziales garantides te n ambient sconé y san
- coutes giustes
- na bona formazion, la convinzion ch’an ne ruva mai da emparé
6. Les mioures forzes con idees nueves y de bones soluzions
Per l’aministrazion y l svilup di comuns méssel vegnì adoré les mioures forzes. La SVP met tl’aministrazion de nost comun eles y ei che à esperienza, na bona istruzion, na convinzion politica sterscia y na integrité morala y che é persones a cheles ch’al ti sta dret a cuer l ben dla comunité. La SVP à na varieté ampla de persones joenes y nueves che à truepes idees y de bones soluzions per i problems y i doviers tl davegnì. L impegn politich dles eles per les eles dess giaté n artegn particolar. L servisc a la popolazion é per duc l dovei plu d’emportanza.
La SVP é per:
- na rei stradala efizienta enfin a tla vila
- la realisazion dla streda Curt – Plazores – La Pli
- la realisazion dla streda per Brach y Cianoré
- na plaza de gliejia desche post de enduneda
- na soluzion adegueda dla encrojeda a San Laurenz
- na soluzion efizienta per Longega
- poscibeltés de svilup a la economia
- finanzié laours con anuzé la cava
- plu control ai scioldi publics
7. Sparagné con i mesi finanziars publics
La SVP vuel investì te strutures per la comunité desche scoles, scolines, ciases de cultura, implanc per l sport, servisc soziai, te laours publics, te scomenciadives economiches, te debujegns soziai fondamentai, desche l frabiché, ma i scioldi de comun é de duc y an mess fé bel empera. I laours publics é ence na sburla per l’economia locala, perchel dess nostes firmes ence giaté chisc laours.
La SVP é per:
- en “Leitbild” (plan arvenent) per l comun
- na vijion plu ampla y de dureda dles cosses
- na dreta politica de investizion
- cialé dai scioldi publics y nia i sciuré al vent
- i laours publics a les firmes da chilò
8. De bogn servisc dlongia les zitadines y i zitadins
La SVP vuel ester plu dlongia a la zitadinanza y ti fé pesé l manco ch’ala va la burocrazia. La SVP vuel ti jì do ai doviers dal comun con cervel, francheza, giustizia y realism. Ala va debujegn de mete a desposizion de duta la popolazion de bogn servisc.
La SVP é per:
- ti dé conseis a la jent
- traté duc unfat
- adoré i scioldi dles coutes con prudenza
- porté inant i problems de nosc zitadins y i porté a na soluzion ence con l aiut da Bulsan
9. L empegn per la pesc interna
La SVP vuel fé jì a una i interesc desvalifs de dutes les classes soziales dl comun y promueve l vejiné y l vive adum en pesc.
La SVP é per:
- colaboré anter les forzes politiches zenza scluje fora degugn
- rejoné con la jent, zenza destinzions
- dialogh davert anter les categories economiches y soziales
- na bona cultura de discuscion y de confrontazion
10. Colaborazion ativa de duta la jent
La SVP é per na popolazion de comun madura che tol pert a les dezijions, che vegn informeda te na maniera completa, che sà da tó scomenciadives de sia bona deventan enscì coresponsabla dl destin dl comun.
Al me plej
(0)Al ne me plej nia
(0)
(0)Al ne me plej nia(0)2 iadesc liet