Lia di comuns ladins: ultims svilups

La Lia di comuns Ladins mana fora l prum burt segnal

Ala adorarà sciche lingaz ofizial l talian che vegn “capì da duc”

La Lia di comuns ladins é pieda via; per jì olà pa? I on audì n grum de toutes de posizion, intervistes y comentars ma al é rie da capì cie che an vuel arjonje con chesta scomenciadiva di ombolc. L president, B. Senoner, se contenta de n valgunes declarazions generiches che ne sclaresc no les funzions no i fins dla Lia. Per l moment àn l’imprescion che al se trate de na scatola vueta che an spera de podei emplenì plu tert con valch projet proponù da an ne sa nia chi. Tla intervista publicheda sun les “Dolomiten” ai 27.04 nes conta l president che la Lia é vegnuda metuda su per damané contribuc aldò dla lege 482/1999; al pensa dantaldut a chestions economiches desche l transiament sun i joufs, sceben che chesta lege sie vegnuda penseda dantaldut per finanzié scomenciadives culturales dles mendranzes linguistiches.

Lia di comuns ladins: al ti mancia ciamò l dret floch
Ombolc de Gherdeina plutost demé enteressés a d’abiné ca valch moneida da la 482/99 che a n projet interladin

Lia di comuns Ladins: n vare emportant
I LADINS se damana che i conseis de comun vegne informés

Statut dla Lia di comuns Ladins
Does o trei cosses dà bendebot a uedl te chest statut

Plu davejin al spirit dla lege 482/1999 é l obietif che al dà dant te na autra intervista sun l’Alto Adige ai 25.04:”Realizzare dei progetti partendo dalla convinzione che la nostra identità culturale dovrà sempre più guidare le nostre scelte amministrative con lo scopo di salvare un preziose patrimonio culturale, sociale e anche ambientale che molto spesso ignoriamo di avere”. De beles paroles, ma él zachei che sa da dì concretamenter ciuna che é chesta arpejon storica-culturala preziousa che vegn trata ca mecanicamenter vigni outa che al vegn rejoné di ladins? L vizepresident dla Union Generela di Ladins, R. Zanoner, seghita a dì, con gran onesté inteletuala, che “chi che pensa de giaté ciamò la vita, les tradizions y l’identité vivudes desche atira do la vera, viv de ilujions”. L mond ladin se à stramudé – cie che i raprejentanc istituzionai dla cultura ladina fej finta de ne savei nia te sies declarazions – y perchel jìssel debujegn de chirì na coscienza identitara, sce al en é mai sté una, autrò, plu avisa tla realté sozioeconomica da encuei, chela crieda da l’industria dl turism y da la globalisazion.
Ma vedon plu damprò co che ala sta con l’arpejon culturala di ladins. O fòssel miec de rejoné de entités sozioculturales al plural, sciche al vegn dit tl statut dla Lia ( “renforzé i liams anter les comunités ladines entourn l Sela)? La geografia y la storia à plu despartì che unì i ladins: dal 16. secul inant fej duc i comuns ladins pert dl Tirol; la partegnenza al imper asburgich à crié n sentiment tiroleis ma nia ladin. Al ne é mai sté n raion aministratif autonom che essa podù daidé svilupé na coscienza identitara ladina. L medem vel per la gliejia: l’organisazion dles diozejes à plu despartì che unì, ence sce sie impat sun la coscienza ladina é sté ciamò plu debel che chel dla politica. Dutes les istituzions ladines, y enscì ence la Lia aldò dl art.3.3 de sie statut, se tol dant de mantegnì cultura y tradizions ladines, ma cie réstel pa ciamò encuei dl mond da zacan? Sce i lascion per l moment da pert l lingaz, puech y nia: strutures architetoniches de viles y mesc, spidic de usanzes, lijendes y conties, che i joegn conesc plucheauter dai libri de scola. Truep patuc vedl é oramai demé da vedei te museums o, completamenter stramudé, te manifestazions folcloristiches sciche ornament o mondura che ne à plu nia da en fé con la vita da vigni dì di ladins. Cie che resta, ence sce valgamia strabacé, é l lingaz, praticamenter l unich element che merscia nost grup etnich desche “ladin” y l desferenzieia dai vejins. L lingaz ne é samben nia demé n strument de comunicazion, n veicul vuet, ma al é lié adum a contegnus, a na maniera de vive, de sentì y de esprime la realté. L lingaz é ence material dla creazion leterara, sibe tles lijendes y conties popolares che tla leteratura d’ert, y perchel él ence contegnù cultural. Perchel, sce al é rie da rejoné de ert ladina en general, pòn rejoné a poura de nia de leteratura “ladina”. Ma ence chilò ne nes fajonse nia massa ilujions! La leteratura scrita ladina a puech plu de cent 100 agn de vita, la tipologia, l stil y ence i contegnus é vegnus en gran pert importés y demé en pert assimilés a la realté locala; chest vel tamben per A. Trebo che per M. Tosi. L “mêtissage” leterar é donca dldut asimetrich y desbalanzé dl vers di modiei foresc’ y perchel pòn demé rejoné en pert de arpejon culturala ladina.
R. Zenoner à rejon canche al dij che al va debujegn de chirì na fondamenta nueva a la “ladinité” pian via da na analisa dla situazion y di bujegns dla sozieté da encuei. Al se trata de capì sce la realté sozioeconomica atuala pieta na dreta basa per y svilupé inant o magari reinventé na spezifizité ladina modena. L’economia dl turism con si aspec positifs (benester) y negatifs (incuinament, speculazions, desdruzion dla cultura da zacan) é defat l trat che unesc plu che vigni auter aspet i ladins dles Dolomites. Ma chesta realté economia y soziala ne é nia spezifica dla “Ladinia” ma ala é comuna ence ai paisc nia ladins dles Dolomites, sciche la auta val de Puster, Ciadoura, Zoldo, Ciastel, Neva ladina/Welschnofen. L problem é donca olà mete i confins y aldò de ciugn criteres. La geografia, la storia y ence les tradizions é, sciche i on vedù, criteres debli y melsegurs. La chestion someia n puech a la discuscion sun l’adejion dla Turchia a l’UE: déssen tò en conscidrazions “in primis” enteresc economics y politics o plutost les raijes culturales sciche fondamenta dla Ladinia moderna? La Lia di comuns ladins varieia te n gran dilema: tl cef de trueps ombolc dess chesta strutura se cruzié dantaldut de chestions pratiches-economiches, ma ala arà la vita curta sce ala ne se cruzia nia ence dla ladinité che amerscia i confins di paisc ladins dla Lia. Ladinité vuel dì, sciche i on vedù, emprumadedut lingaz ladin y perchel jìssel debujegn, sciche prum vare, de adoté n lingaz scrit unitar per documenc y comunicazions. L ladin scrit unifiché o ladin standard se pitassa sciche la soluzion plu logica y dantman, ma chilò sautel atira fora na contradizion grieva che manacia de scassé sotissoura l bel ciastel. I ombolc de Souramont y Fascia, sciche al é vegnù scrit, fossa a una de adoré l ladin unifiché, ma chi de Badia y dantaldut de Gherdeina à metù n veto o pesimeia. L compromis che an à arjont é, pérel (ma ofizialmenter ne végnel dit nia, an scouta plu gen via i problems), de adoré l talian sciche lingaz veicolar, con la vertola che duc i ladins capesc y sà da scrive chest lingaz. N burt segnal chest dl lingaz: i idioms ne vegn nia capis anter i ladins y samben degugn ne é a una de adoré un di idioms sciche lingaz ladin ofizial, la koiné interladina vegn refudeda dai comuns sudtiroleisc per rejons ideologiches-politiches, la soluzion plu comota é donca de adoré n lingaz forest. Na Lia di comuns ladins che rejona talian, na bela “contradictio in terminis”!
Da na lia “ladina” éssen podù se aspeté sciche prum at ofizial does deliberazions per enscì dì logiches o d’ofize: una che scriv dant l ladin unifiché sciche lingaz ofizial y de laour dla Lia , aldò dl spirit dl art. 3.3a) dl statut, y l’autra che ofizialiseia l sostegn al referendum di ladins de Souramont, aldò dl art. 3.3b) (“mantegnì y renforzé la coscienza de partegnuda a na soula entité sozioculturala y renforzé i liams anter les comunités ladines entourn l Sela”). Ma i raprejentanc dla Lia se ascon via do vigni sort de vertoles per ne messei nia tò posizion, per ne avei nia bria de se engajé per la unificazion di ladins. Al se trata de n moment dret zite, végnel dit, ma propi per chest se aspetàssen da nosc ombolc n segnal fort de solidarité interladina y dantaldut deplù snait politich. Cie che an à vedù enfin a sen é n fum verbal zenza sens. Se témei da sia ombria o ài valch d’auter tl cef? Magari podessa nes dé n sclariment l president, B. Senoner.

Erwin Valentini