Sce la Union de Fascia vuel, sonsi enjigné a dé mie contribut
Fabio Chiocchetti sclaresc te chesta letra sia posizion envers na eventuala candidatura a les lites provinziales 2008
Stimés amisc,
i é sentù che al vegn rejoné de litazions y de candidatures, y acioche al ne vae nia stroz strantenimenc sun mia posizion volessi ves fé al savei foraldret che i ne é deguna aspirazion per l post de conseier provinzial, y souraldut deguna idea de me candidé te listes de partic nazionai o regionai, desche i é perauter declaré ultimamenter te na intervista a la “Usc di Ladins”.
Enveze sonsi a desposizion per l’Union Autonomista Ladina, sce te chela lista saràl n grup de persones da podei conesce fora desche dreta esprescion dl Moviment Ladin, donca dl’identité ladina de Fascia y di valours storics y ideai portés inant per agn da l’Union di Ladins, sun les pedies de jent desche Guido Jori Rocia, Remo Locatin, Danilo Dezulian dal Garber, Simonin Maza, Ezio Anesi y tanc de autri.
Te chel caje, sce l Consei dl’Union di Ladins de Fascia me l damanarà, saréi ben content de dé mie contribut, ma desche blot “portadour de ega”, zenza deguna ambizion personala y con la soula intenzion de testimonié che tla UAL él ciamò de chi che enten la politica desche n servisc al ben dla comunanza.
Sce na tel candidatura vegnissa proponuda y azeteda me empegnaréi – i spere adum con de autri amisc che se reconesc ti valours storics dl Moviment Ladin – acioche la UAL sostegne con propostes y fac concrec l smendrament di “privilegs” di politics a livel provinzial y regional, y che ala mete dant na acordanza che empegne dantfora l Conseier ladin a destiné pert de sie paiament a fins soziai, umanitars y culturai. Chest per desmostré che i candidac de la UAL ne se met nia en lista per la cariega.
Demé a chesta maniera, amedit, i fascians podarà desmostré de merité l “scagn” resservé y duc i autri derc davagnés con agn y agn de batalies.
Stajede ben
Fabio Chiocchetti del goti
(0)Al ne me plej nia
(0)5 iadesc liet