Plu democrazia ti comuns che dant 5 agn
Svp de Urtijei perd -12,2 % – La Svp de Selva perd -7,3% dles oujes – La Lista LADINS se mantegn te Gherdeina – Dolores Dariz ne ruva nia ite a Bulsan
La lita é fata, i conseis de comun é lités. Les novités dantfora: la Svp de Urtijei ne pò nia plu governé da soula, ma ala mess jí ite na coalizion con i “Ladins” (4 scagns) o la “Lista Zivica” (6 scagns). L ombolt, Ewald Moroder ne á nia arjont la maioranza, ma l 43,6% dles oujes. Tomé tres é l candidat da ombolt dla SVP a Selva, Diego Bernardi (demé 27%), condut l reclam, les prescions y l sostegn da la zentrala a Bulsan. A Corvara perd l candidat dla Svp, Robert Rottonara, tl confront con Franz Pedratscher. Do rata ben se bat la lista LADINS a Urtijei, oláche ala davagna permez 1 n scagn y a Selva oláche do l scherz con l ombolt Roland Demetz rúvela empò ite con 3 conseiers. Deguna lista ne á a Selva la maioranza assoluta tl Consei. Chela de Roland Demetz (chest iade lista de paisc empede lista LADINS) perd 2 scagns y mess jí ite na coalizion per conduje inant l’aministrazion comunala.
Dolores Dariz, chest iade desche autonoma sun la lista “Margherita”, ne ruva nia ite. 122 oujes de preferenza ne á nia cleché per n scagn. Baudi ne se ál nia paié fora de sconé les bries de mete endò en pé la lista “Ladins” a Bulsan.
En general ne á i funzionars locai dla Svp nia abú dlonch suzes da les veles: a Urtijei toma tres Simon Moroder, a Al Plan de Mareo Franz Kanetscheider, a La Ila Crazzolara, tles frazions ladines de Ciastel Otto Rifesser y e.i., a Selva ruva ite Christoph Perathoner (Bezirksobmann dla Svp Bozen-Land), ma con scialdi puech consens per l partí, la Svp slisola ju a Selva dl -7%. Chest condut l reclam lital y les prescions dla zentrala a Bulsan che á mané su a Selva ence les majeres ciaries de partí a sostegní l candidat da ombolt, Diego Bernardi, a dí: a Bulsan él plu saurí arjonje valch, sce un é dla Svp, l’influenza di autri ne và nia soura comun fora. Ala ne à jové a nia.
La situazion stabiliseda dla lista LADINS te Gherdeina fej sen vedei dantfora con n pue plu otimism na partezipazion a les lites provinziales 2008.
L cheder: dut adum na situazion plu normaliseda y plu democratica envers a dant 5 agn. Na situazion politica normala arán endere canche deguna lista o partí ne pò plu aministré zenza jí ite na coalizion.
Lites de comun – Resultac ti comuns ladins
Gherdeina:
Val Badia
Fascia/ Provinzia de Trent
Al me plej
(0)Al ne me plej nia
(0) 2 iadesc liet
