Les enciaries: Govern Provinzial Nuef y presidenzes

Les eles tla Svp “revolteia”

L obmann Siegfried Brugger deura les tratatives con les “eles tla Svp” – Na avocatessa vuel ejaminé n recurs – Mussner confermé desche assessour – Alleanza Nazionale, ex MSI, vegn enauzeda per l prum iade a onours istituzionai

Ence do che les enciaries tl Govern provinzial nuef y les enciaries istituzionales é vegnudes sourandedes enier, ne vuel les eles tla Svp nia la dé su tant atira y dé na tria. Dantaldut la capora dles eles tla Svp, Martha Stocker, che ne é no vegnuda touta ite desche assessoura, no desche presidenta dl Consei, desche an se aspetova perdret, se sent ofenuda dal comportament de sie partí. A Florian Mussner ti él vegnù confermé la enciaria da assessour. Giorgio Holzmann de Alleanza Nazionale (ex MSI) é vegnù enauzé da la Svp a onours istituzionai, al deventa vize dl Consei Provinzial, na raida politica a la lum dl soredl, do che Svp y AN colaborova bele da n pez “do les coltrines”.

Dlongia “les eles dla Svp” à ence protesté l aconsiadour Pahl, les eles tl KVW y d’autri grems al intern dl partì tant giut che l obmann Siegfried Brugger à messù se declaré enseira a una de daurì endò les tratatives. La avocatessa Christine Mayr, enstessa esponenta dla Svp, ejamineia enfinamai la poscibelté de n recurs, aja che la repartizion dles enciaries contradij al statut dla Svp. Ciamò anter la fin dl’edema vuelen ruvé a na conclujion.

Al me plej(0)Al ne me plej nia(0)

1 iadesc liet