Lege 482/99 – La Generala se muev

Enconteda con les autorités dla provinzia de Trent

L Consei dla Generela se muev per arjonje l reconesciment desche organism de coordinament y de proposta desche vedù dantfora da la lege nazionala 482/99

de Lorenzo Soratroi

La Generala se muev per giaté l reconesciment da les Provinzies. L prum vare é sté chel de se enconté con les majeres autorités de Trent, en vender ai 7 de mei. Dut l Ofize de Presidenza dla Generala, con l president Nani Pellegrini, l Vize president Egon Vinatzer y la aconsiadour Fabio Chiocchetti, à abù n’enconteda con l president dla Provinzia Lorenzo Dellai, l president dl Consei Provinzial, Mario Magnani y con l Vizepresident dl Consei Regional dla Region Trentin-Südtirol, Luigi Chiocchetti. Desche dit, argoment prinzipal dla discuscion é sté l reconesciment dla Generala desche “organism de coordinament y de proposta souraprovinzial”. N vare prevedù da la lege 482/99 che al art.3, coma 3 dij: ”can che les mendranzes é despartides su sun deplù Provinzies o Regions, pò chestes mete en pé organisms de coordinament y de proposta che i enc locai à facolté de reconesce.” La Generala à bele per sia conzezion dutes chestes carateristiches. L president dla Generela Nani Pellegrini y l president dla jonta trentina Lorenzo Dellai con tles mans la gramatica y l dizionar dl ladin standard che ti é vegnus sourandés te chesta gaujion.

Nasciuda tl 1905 per raprejenté duc i ladins, ála souravivù duc i avenimenc storics dl 19eisem secul, da la pruma vera mondiala a la despartizion di ladins sun trei provinzies, voluda dal fascism tl 1923. L laour dla Generala é sté fondamental per tegnì su y fé cresce l’identité storica-culturala dles popolazions ladines dles vals entourn l Sela. “L’enconteda con i raprejentanc dla Provinzia de Trent é steda dret positiva”, à dit Nani Pellegrini. ”Les autorités à desmostré de avei gran sensibelté y de conesce dret ben i problems che les popolazions ladines enconta per tegnì su sia identité a gauja dla despartizion aministrativa. En particolar ài sotlinié la nezescité de na politica de sconanza che ciale soura i confins aministratifs y la uega de reconesce la Generala desche organism transprovinzial, per na politica plu sterscia ti confronc di bujegns dla jent ladina. Per cie che reverda chest pont él vegnù dit de ester enjignés a mete a jì duc chi prozedimenc aministratifs de sostegn a projec de interes souraprovinzial, coche per ejempl a la Usc di Ladins, l soul organ de stampa scrit dut per ladin.” Defata vuelen se enconté con l president dla jonta da Bulsan Durnwadler. (ls/if)

Al me plej

(0)Al ne me plej nia

(0)

2 iadesc liet

Ortiede inant tres