Le Presidënt dl Parlamënt dl’Austria Andreas Kohl te Südtirol

 

Carlo Willeit enconta Andreas Kohl

Kohl empermet de daidé i Ladins a ester reconescius a livel internazional

Le vizepresidënt ladin Carlo Willeit à ilustré aspeć de sconanza dla mendranza ladina y perié le presidënt dl Parlamënt dl’Austria, Andreas Kohl da s’adorè por n reconescimënt internazional dla mendranza ladina en gaujiun dl’incuntada albüda inier (09.01.2003) tratan so intratëgn te Südtirol. Söl retrat: Andreas Kohl y Carlo Willeit.

(g.m) Incö (nrd. Inier, 9.01.03) ti à le neodesigné Presidënt dl Parlamënt dl’Austria, Andreas Kohl, fat na vijita ofiziala a Südtirol. Te chësta ocajiun àl incuntè deplü autoritês y rapresentanć dles istituziuns, danter ater inće i mëmbri dla Presidënza dl Consëi provinzial de Südtirol. Argomënć prinzipai dl’incuntada è stà la sconanza dles mendranzes a livel de stat y dla Unité Europea y le debojëgn che chësta vëgnes ancorada tla convenziun (costituziun) dla UE, sciöche inće problems atuai dl transit. Tut pert ala incuntada à inće le vizepresidënt ladin Carlo Willeit che á te so intervënt orü sotlinié i vari positifs che è ti ultims agn gnüs fać tla sconanza di ladins. Chësc è dantadöt da reportè, insciö sües parores, al gran impëgn politich di ladins instësc che à contribuì dassënn a raforzè süa identité y cosciënza. Willeit s’aspeta da chësc prozès l’arjunjimënt de parité de dërć y de sconanza, na majera independënza y unité ladina inće sura les provinzies y regiuns fora. Al è gnü recordé che inće i ladins à messü fà de gran sforc por se concuisté reconescimënt y sconanza internazionala, nia por ultimo cun la sentënza dla Curt Costituzionala dl ann 1998. Le rapresentant ladin à te chësc contest alzè fora che l’Austria y so Parlamënt à na funziun de garanzia daspavënt importanta perian porchël le presidënt Kohl da conscidré y da tignì cunt te süa politica inće di dër debojëgns di ladins

1 iadesc liet