Albert Pizzinini à rejoné pro la meisa torona, cherdeda ite dal minister ai Interns Roberto Maroni, de chestions ladines
Anter i enviés a la meisa torona per la convivenza te Sudtirol cherdeda ite dal minister ai Interns Roberto Maroni, ai 30 de jugn a Bulsan, fòvel ence n raprejentant de Ladins Dolomites tla persona de sie president, Albert Pizzinini. Ladins Dolomites vuel mescedé empera y ne ti lascé nia dut a la Svp che veid ti ladins na componenta da tralascé, sciche al é vegnù desmostré entratant l’enconteda. Maroni ova fat la proposta de na meisa torona do les tenjions etniches te Sudtirol en chesta aisciuda per gauja dl monument ai alpins a Bornech.
L assessour Florian Mussner fova pro la “meisa torona”, ma sun i ladins ne àl abù nia de particolar da mete dant.
Te sie entervent à Albert Pizzinini dantaldut metù l peis sun la valivanza de tratament per arjonje na miour convivenza anter i grups linguistics tla provinzia de Bulsan. Bendebot de enteres anter i partezipanc talians à enconté sia proposta de slarié fora la scola paritetica do l model ladin te dut Sudtirol. Pizzinini à ence sciolé su la proposta de mete su la senta dles Dolomites sot a sconanza UNESCO tla Ladinia, tòlela pu ite na gran pert dl raion dolomitan. De chest vers él sté samben manco resson. Pizzinini rata che te chesta chestion él i ombolc o la lia di comuns ladins che mess mete sun meisa chesta ghiranza per avei plu fazion. L ombolt de Corvara, Franz Pedratscher, à bele proponù Corvara sciche senta. N auter candidat, ence da pert de Belun, podessa bonamenter ester Cortina d’Ampez con sie certl de creps dolomitics che degun auter luech ne à da mostré su te na tel grandeza. Les chestions ladines é ence autres: p.ej. i proscims varesc per l referendum de Ampez-Col-Fodom, l aument dles trasmiscions radio-televisives, na redazion autonoma dla RAI ladina, l reconesciment dla Generela, n tratament scolastich unfat te dutes les provinzies, (p.ej. na intendenza scolastica soula), l daz Mussner sun i joufs dolomitans, chestions nience azichedes enfin a ciamò. Pizzinini à envié i ministri Roberto Maroni y Roberto Calderoli, tramedoi dla Lega Nord, de avei na enconteda empera.
Da pert dla Svp ne él sté degun entervent spezifich en cont di ladins. L assessour Florian Mussner à fat n descurs dassen general. Les encontedes con Maroni jirà inant te na seconda fasa y ilò vegniràl metù ju les propostes per scrit per avei n papier de laour. Con Florian Mussner à depierpul Albert Pizzinini fat fora de avei na enconteda per rejoné de chestions politiches tl temp che vegn.
(0)Al ne me plej nia
(0)