Ivan Lezuo: les afermazions dla Svp de Gherdeina ne à deguna fondamenta logica
Ampez, Fodom y Col se ova bele damané de resté pro Sudtirol denant che al fossa la Svp – Afermé che l destach de Gherdeina y Badia da Sudtirol fossa fatal y tl medem temp dí che la colaborazion soura i confins é assé ne à deguna fondamenta logica
Sun l comunicat stampa dla Svp de Gherdeina entervégnel l storich y ex-president dla Comunanza Ladina a Bulsan, Ivan Lezuo, a chel che al ne ti à nia plajù cerc referimenc storics che straouj do sia minonga l significat dl referendum. Fora de uega él da tré ca “la provinzia ladina” y contraditor tamben l sostegn a la politica de Mussner che rejona demeztroi de “colaborazion”, ma che defat deida daven con sia politica, l ejempl plu eclatant é l boicotaje al ladin scrit unifiché.
Chesta é la letra daverta che Lezuo ti à mané al sourastant dla Svp de Gherdeina, Stefan Runggaldier:“L raion SVP de Gherdeina pò samben se paré contra na unité ladina y na
reunificazion di trei comuns da Souramont con Südtirol, ma al messessa mefo
l motivé con argomenc obietifs y da fondament. A Vost entervent él da ti tegnì decontra:
1. Sce vos dijeis che sen ence i ladins da Souramont se à finalmenter entenù
che la politica de mendranza dla SVP é de suzes y “lungimirant”, spo
straojeise la realté. Te 85 agn de despartizion sforzeda à i trei comuns con
petizions, memorandums y deliberes de comun tres manifesté sie dejidere de
se unì endò con i ladins de Südtirol, canche l’autonomia fajova ciamò si
prums varesc y la cassa dla provinzia ne fova nia ciamò tant plena. An pò
spo dretant dì che al é l raion SVP de Gherdeina che se enten finalmenter
dles ghiranzes da souramont.
2. La contestazion che al sie cerc certli politics che sburla do per na
provinzia ladina y l destach de Gherdeina y dla Val Badia da Südtirol é
zenza fondament. Dijedenes preibel publicamenter inoms, partis y programs
che pò confermé cie che Vos dijeis! Zenza é Vostes acusedes demé
insinuazions speculatives con viadedò fins propagandistics.
3. L’afermazion che l destach da Südtirol de Gherdeina y dla Val Badia é n
gran dann per duc i ladins, depierpul che tl medem temp proveise de impedì l’unificazion
di trei comuns da souramont con Südtirol, dijan che na colaborazion soura i
confins fora sie plu che assé, ne à net deguna fondamenta logica.
4. Preibel ne stede nia a adoré l referendum per encenscé la politica dla
Volkspartei, ajache al n’é nia dut aur cie che slumina. Al se porta empò pro
che te Südtirol él les condizions per na dreta politica de mendranza y che
ales à tla maiour pert ence dé si fruc. Te chest pont sonsi a una.
Dit chest él cler: chi che ne mostra nia dant sies veires intenzions, se
envadadleia tres deplù te n grum de contradizions.”
glossar
daidé daven= fé valch a dann (gherdeina judé daven, daven=cialà, demez)
(0)Al ne me plej nia
(0)1 iadesc liet