La Quotidiana á arjont la majera eté

La Quoditiana: l foliet á abú da scombate per sté soura ega via te chisc prums 18 agn.La Quoditiana: l foliet á abú da scombate per sté soura ega via te chisc prums 18 agn.

Nosc fredesc, i rumanc dl Grijon à dant puec meisc podù festejé la majera eté de sie foliet dl di “La Quotidiana”. Deplù fatours ova porté pro che La Quotidiana ova giaté na majera garanzia da podei vegnì al mond, da vegnì azeteda y da podei souravive:

  1. Dl 1994 ova l govern federal a Bern lascé fé na enrescida anter i rumanc dl Grijon per vegnì lassoura, cie idiom che ai essa l plu gen che vegnissa raté l lingaz aministratif, n idiom local o l lingaz unifiché? Na gran maioranza ova chirì fora l “Rumantsch Grischun “ – rg, l lingaz rumanc unifiché; chest fova vegnù cherié dal prof. Heinrich Schmidt dla université de Turic con paroles toutes da duc i idioms rumanc; chest lingaz tet gniva adoré bele dal 1982 ensù da istituzions privates sciche dala Lia Rumantscha y autres lies.

  2. Do chesta lita da pert di rumanc ova l govern federal a Bern deliberé ai 2 de messel dl 1996 da adoré l “Rumantsch Grischun “ / rg /  sciche lingaz aministratif te sies publicazions, comunicazions, decrec y leges che reverda i rumanc. La medema delibera à spo ence fat  l medem  di l Cianton Grijon: sie lingaz aministratif fossa ence l lingaz rumanc unifiché.

  3. Dl 1996 fovel spo ence vegnù metù su con na lege federala la Agentura Novitads Rumantscha  ANR, finanzieda dal govern federal a Bern y dal Cianton Grijon a Coira; chesta Ajentura i pieta da laouta encà a duc i media rumanc i tesć de noeles y i retrac lapró.

  4. Ma con integré i foliec edemai – Fögl ladin (1841 – 1996), Gasetta Romontscha (1857 – 1969), Casa Paterna/La Punt (1920 – 1996) te La Quotidiana  fova la nasciuda dl foliet La Quotidiana vegnuda garantida.

Dl 1997 fovel vegnù fora l prum numer dl foliet La Quotidiana che fova bele da agn aspeté; al ova abù giut da nasce, les dories fova stedes longes y sfadiouses, se tratovela pu da vegnì con n foliet che essa podù jì ben per duc i rumanc. Per ti jì adincontra ai rumanc adora La Quotidiana duc i cinch idioms rumanc (sursilvan, sutsilvan, surmiran, puter, valader) per comuniché les noeles y i articui che reverda les singoles valedes rumances; i tesć che trata argomenc souraregionai, per deplù regions rumances, scriv La Quotidiana tl lingaz rumanc unifiché, l rg. Chest fova vegnù metù adum da paroles toutes da duc i cinch idioms rumanc y al vegn liet y entenù da duc saurì. Enscila él ence vegnù metù adum da paroles de deplù dialec l lingaz todesch – Hochdeutsch – che an empara te scola y l talian à abù la medema streda. L rg é n lingaz de scritura y da lieje. Rg é na prova per mioré la situazion dl rumanc y per ti garantì al rumanc na majera presenza tl mond di media. I comuns fej fora, sce ai vuel adoré l lingaz unifiché y sce al dess vegnì ensegné te scola. La Quotidiana é l soul foliet dl di tl lingaz rumanc.Con l aiut dla Ajentura Noeles Rumances él vegnù cherié n foliet dl di che pò se lascé vedei. La redazion é motiveda, engajeda, competenta y intenzioneda a lauré l miour per mantegnì l rumanc, sibe i cinch idioms che l rumanc unifiché.

La funzion primara de La Quotidiana é enformé y prejenté l rumanc vigni di per scrit; ala promuev l lingaz y la cultura rumancia con renforzé la coscienza y la identité interrumancia. Ala porta pro a na majera vejinanza y capida anter i idioms rumanc y la capida passiva dl lingaz tet di rumanc. Che l rumanc sibe bon da souravive val debujen dl foliet dl di. Funzion de La Quotidiana él ence, renové l lingaz y fé ponc anter i idioms rumanc y enscila daidé cherié na identité deberieda, anter duc i rumanc y nia ma locala. L rg ne vuel nia rogosé i idioms, mo i arichì con n lessich modern. Neologisms vegn dantaldut fac conescius y slargés fora con material scrit; manciassel l foliet, spo ne podessa l lingaz nia se svilupé inant y al manaciassa con l temp da sparì. La Quotidiana é dret emportanta, ajache tl radio y tla televijion aud la jent ma les paroles nueves, depierpul che ala pò vedei te La Quotidiana sciche ales vegn scrites. L spidic di idioms rumanc é ence l pericul che na pert di idioms vegn rejonés tres manco y che i idioms vegn plu sauri bastardes tres deplù da paroles forestes. Al va debujen de na coscienza, na identité rumancia souraregionala y che i rumanc mostre deplù enteres per la situazion linguistica y culturala de duc i rumanc, che ai ne se tache nia ma a sie idiom local. Con la adoranza dl lingaz unifiché / Rumantsch Grischun/ crescel la identité interrumancia y la capida anter les valedes, cie che deida i rumanc tegnì adum y se renforzé y se raté deberieda na popolazion. La Quotidiana é dret emportanta ence per mantegnì la varieté dl rumanc, giati pu dal rg n gran aiut tres neologisms. La Quotidiana é la portaousc dla Rumancia; ala tol ite les regions rumances linguistiches zenza perchel scluje i uedli defront al auter mond. Che La Quotidiana vive inant trueps agn con l aiut finanziar de trueps abonés, dl govern federal a Bern y dl govern a Coira ti aoda i ladins dles Dolomites!

Lois  Trebo 

Al me plej(2)Al ne me plej nia(0)

49 iadesc liet

Ortiede inant tres

Scrive n comentar a revert de "La Quotidiana á arjont la majera eté"

Scrive n comentar

La miscion e-mail ne gnirà nia publicheda.


*