La protesta ruva al Comissariat

I conseiers di „Ladins“ tl consei de comun de Urtijei ne vuel nia plu azeté che propostes de mudazion al bilanz ti ruve al ultim moment, monce tres e-mail y nience a duc i conseiers, zenza avei plu dlaorela de se enjigné ca, de se cialé ju y studié la documentazion. I conseiers se baudia tamben che al ne é degunes rejons de prescia viadedò che giustifichessa na tel prozedura. Sciche oposizion te comun ne ciafia enscì i conseiers di Ladins nia plu da porté dant a dret propostes, mudazions o enjontes en cont de chisc capitui.  Georg Moroder, conseier de comun.

Chest é suzedù pro la ultima senteda de consei, ai 31 de messel, olàche al ti é ruvé ciamò en chel dì, pueces ores dant la senteda, tres e-mail, na mudazion al bilanz de 250.000 euro. Sun chesta ova i conseiers di Ladins, Adi Demetz y Georg Moroder,  arbandoné l salf de consei en segn de protesta.
Sen ti à la frazion mané a la souraverda dles corporazions locales na letra de protesta, ghiran na intervenzion pro l ombolt y l comun che al vegne tegnì ite i termins. La souraverda ti à da sia pert responù che aladò dla reforma costituzionala dl 2001 ne éla nia plu competenta y ti à raidé inant la chestion al Comissariat dl govern per na dezijion.

Al me plej(0)Al ne me plej nia(1)

620 iadesc liet