“La LISTA LADINS dess jì inant”

Les previjions de suzes lital é permetentes

Da l’enrescida envieda via per conesce la minonga dla jent él sauté fora che la LISTA LADINS se à enchin a encuei davagné respet y conscidrazion anter la jent

(if) Con l’ultima revista “Ladins” ova la LISTA LADINS mané fora na enrescida per vedei sciche l laour politich promuet ti ultims diesc agn vegn vedù y valuté, sce al corespon a les aspetatives y cie che la jent se aspeta per i agn che vegn. L sfuei é vegnù mané fora te passa 6.500 ejemplars y al é sté endut passa 400 che à responù a les domandes, y chest ne é nia puech. Dai resultac sautel fora n valgugn dac interessanc y indicatifs per la minonga di litadours. Oramai duc chi che à ortié ite les respostes é dla minonga che la LISTA LADINS dess jì inant con sie laour y che sia prejenza va debujegn a Bulsan. Al ti vegn reconesciù che ala à te chisc diesc agn d’ativité dé n contribut sostanzial al pluralism politich y che ala à portè pro te nosta Provinzia a plu democrazia. Sce an rejona bele de enrescides él ence da recordé i resultac dl’enrescida deda su per cont dl sfuei DOLOMITEN al Gallup-Institut da Viena y publicheda encuei tla DOLOMITEN a pl. 13. La LISTA LADINS scluj ju con l 2% y ruva enscì a se plazé atira do la Union y – cie che fej demarevueia – dant i Freiheitlichen. Demarevueia fej ence l fat che di 500 damanés respon ben 41% de ne savei nia ciamò a chi ti dé la ousc.

Chilò damprovia les domandes con les respostes ruvedes ite:

1. À la mendranza ladina debujegn de na sia organisazion politica autonoma?
   320 ee  – 32 no
   
2. È la Lista LADINS politicamenter importanta per la jent de Südtirol?
   380 ee – 25 no
   
3. À l laour politich di ultims diesc agn auzé la conescenza y la consciderazion di ladins, y àl porté pro a plu rejons, plu strutures y plu servisc per i ladins?
   387 ee – 21 no
   
4. Se à pa la Lista LADINS cruzié assé di debujegns dla jent?
   320 ee – 46 no
   
5. Eise con la Lista LADINS giaté plu informazions te ciasa, tla stampa y tla radio/tv, y enscì ence deplu poscibeltés da portè dant Vostes domandes?
   382 ee – 15 no
   
6. À la Lista LADINS contribui te nosta Provinzia a deplù democrazia?
   376 ee – 23 no
   
7. Cie pont particolar voleise pa che al sie sun l program dla Lista LADINS per les lites de chest auton?
   73 – l’abitazion y l laour
   62 – speculazion dl frabiché
   56 – viabelté tles valedes
   34 – problems ambientai
   24 – la familia
   12 – scola, lingaz y cultura

Al me plej(0)Al ne me plej nia(0)

1 iadesc liet