I candidac dla lista LADINS a Bulsan se damana la creta
Ala va debujegn per conté ciamò valch dlongia talians y todesc – Ladins de dutes les valedes y simpatisanc
I Ves prejenton encuei la lista nueva “Ladins” per les lites tl Comun de Bulsan ai 6 de november. Na lista valgamia renoveda respet a chela dl 2000. I candidac laora tl setour economich privat y te chel di servisc. Dutes persones che crei ciamò tla identité ladina y che é a una de tegnì su la comunanza ladina a Bulsan, che tol ite ladins de dutes les valedes y souradut per ti garantì n raprejentant te comun.
Do la burta esperienza de chesta aisciuda, olàche an à prové, gauja en grumon de dificultés, de se mete adum con la “Margherita”, àn volù sen jì endò da soui, de fé vigni sforz per ester indipendenc y mostré su nosta autonomia desche terz grup linguistich. Al é enscí nasciù na lista lesiera, zenza de gran pretenjions, ma unida y con la ressoluteza de arjonje l fin: n candidat te comun. Ala se aoda che l sforz, la volenté de salvé la onour dla comunité ladina a Bulsan vegne reconesciuda y premieda da la popolazion de Bulsan. I candidac dla lista mess mete per na pert ence de si scioldi, aja che i finanziamenc a disposiziun ne cleca nia. Perchel, nia demé degun davagn, ma enfinamai spenules de sia tascia. Ala se trata dla vueia de ester se enstesc, de volei conté valch anter talians y todesc. Trueps de chisc candidac ne fova nia a una da d’aisciuda a jì deborieda con la Margherita y perchel se ài abiné plu iadesc per traté l problem y al é vegnù tout la dezijion de jì da soui. Al desplej dassen l fat che ala ne sie nia garateda na lista deberieda con l candidat dla Svp y chel di Ds. Empò sonse chilò, magari grams per l laour y i sacrifizes che nes aspeta, ma al nes conforta la speranza dla comprenscion y dl aiut dla jent ladina che viv tla zité da Bulsan. Chesta lista vuel ester en scrai nuef, n impegn a ruvé ite te comun per nes fé audì. Na cossa él vegnù dit clermenter: l candidat che ruvarà ite te comun ne vegnirà nia plu lascé soul, sciche al é suzedú enfin a sen, ma al arà l sostegn de n comité per les lites. Chest comité arà sie scagn fora da chel dla Comunanza y dla Consulta, per podei rejoné liberamenter y fé propostes concretes da porté inant te Consei de Comun. Ala se trata de n vent nuef y perchel, Ladins da Bulsan, Ves prionse de nes daidé, de nes dè la creta per avei nosta raprejenatanza te comun. I ne on nia i scioldi per fé reclams, ma i on la parola per nes fé audí te comun y giaté chi segns y cheles cosses che nes desfarenzieia da talians y todesc. La lista ti dà samben l sostegn al candidat ombolt Luigi Spagnolli.
Ladins, tegnon adum, la forza vegn dal grum! Demé unis podaronse speré de arjonje i fins.
Chesta la lista:
Capolista, Enrich Walter, emplié dla Provinzia, gherdeina;
Dariz Dolores, empliada dla Provinzia, badiota;
Lezuo Ivan, professour de todesch, fodom;
Debertol Margherita, infermiera de profescion, fasciana;
Deiaco Iaco, cuech de profescion, badiot;
Debertol Riccardo, comerzialist, fascian;
Lafogler Manuela, maestra, todescia
Palfrader Angelo, infermier de profescion, mareo;
Donè Franco, funzionar, fodom.
 Enrich Walter |  Dariz Dolores |
|---|---|
 Lezuo Ivan |  Debertol Margherita |
 Deiaco Iaco |  Debertol Riccardo |
 Lafogler Manuela |  Palfrader Angelo |
 Donè Franco |
(0)Al ne me plej nia
(0)2 iadesc liet