L certl ne se à nia sclut
Enconteda a n’Ampez: La Generela va inant con i colocues con raprejentanc dles istituzions de Trent y Belun per arjonje n reconesciment desche organism souraprovinzial
Senteda ampezana per l’Union Generela di Ladins dles Dolomites. Enstadì defat, vender 21 de mei, à l president Nani Pellegrini cherdé adum l ofize de presidenza a Cortina per descore, anter les autres robes, ence dla situazion politica desvaliva che i Ladins sot a Belun, Trent y Bulsan viv. “La Generela” liejen te n comunicat, “é l organism de coordinament y de proposta per la promozion y la conservazion dl’identité storich– culturala dl raion ladin che tol ite les popolazions dles vals de Ampez, Badia, Fascia, Gherdeina, Fodom y Col.” L diretif olàche al é laite deberieda con l president ence sie vize Egon Vinatzer y l aconsiadour Fabio Chiocchetti, á analisé tla senteda via n’Ampez la situazion che s’à crié do la revendicazion de identité storich–culturala ladina da pert de na gran sondla de comuns dles provinzies de Trent y de Belun, do che al é ju en doura la lege 482/99 sun la sconanza dles mendranzes.
“La Generela”, pòn lieje plu inant tl comunicat, “é cruzieda per l rise de assimilisazion dapert di movimenc neo-ladins tl Venet che raprejenteia truep deplù jent y che vegn sostegnus politicamenter da motivazions litales, plu che da criteres de ladinité y de coscienza storica de comunité ladina. Per chesta gauja se para Generela con forza da vigni tentatif de strumentalisazion de sia identité per rejons de oportunism y ala damana a les istituzions che ala vegne reconesciuda desche organism cultural souraprovinzial. ”N referiment cler souradut devers dles istituzions aunejianes (venetes) y belumates, ma ence a les encontedes che é vegnudes metudes a jì ti dis passés con raprejentanc politics y istituzionai dles provinzies de Trent y de Bulsan. Argoment de discuscion, chel sàn, é sté l reconesciment dla Generela dapert dles provinzies, aladò dl articul 3, coma 3 dla lege cheder nazionala sun les comunités de mendranza. L “certl” ne se á nia sclut per l moment, davia che tla provinzia de Belun ésen dant a les lites, da olàche al sautarà fora l president nuef dla Provinzia. Y al é propi pro chisc nuefs raprejentanc y istituzionai che ti proscims meisc l ofize de presidenza y la Generela jirà a clocoré y a bate cassa per otegnì cie che é bele vegnù damané a Trent y a Bulsan, l reconesciment dla Generela desche organism cultural interladin.
(0)Al ne me plej nia
(0)3 iadesc liet