Truep interes personal do les jontes nueves
A Urtijei él vegnú marciadé al mender priesc – Tl comun de Selva se á l ombolt destaché do 10 agn da la lista LADINS
de Carlo Willeit
„L’economia é la fondamenta dla sozieté“- chest titul dla declarazion programatica de Selva carateriseia ben la direzion dla politica comunala tl davegní, ma al ne é nia bon de ascone la gran incoerenza, l oportunism politich y l interes personal che é do les jontes nueves via. Iniò ne corespon les jontes fates y da fé a la volenté di litadours y iniò ne vegn metudes en pratica les beles empermetudes de laoré adum con duc per l ben de duc. Foto: Carlo Willeit / Ladins.
A Santa Cristina mess cialé la SVP de sia jent sclujan fora zenza valch autra motivazion la lista LADINS, a Urtijëi él vegnú marciadé al mender priesc y souranuet é stés i LADINS defora da porta. Tl comun de Sëlva, oláche l ombolt y na pert de sia lista zivica se à destaché do diesc agn da la lista LADINS, vegnirá la jonta liteda endoman. L comportament y les declarazions-propostes fates enchin a encuei và fora sun na coalizion lista zivica –SVP y l liam anter LADINS y govern dl comun se finará chilò coche al se finará l liam ideologich anter i grups y les persones. De chest liam él ciamò plu sciot che dla partezipazion a na jonta, ajache sies radiazions é plu stersces y và lonc soura i confins dl comun fora. Sia forza acompagneia l destin dla populazion entiera.
Ma ruvan endò pro les jontes de comun, someiel che les coalizions zenza LADINS sie na cossa fata fora te Gherdeina y valch superb esponent politich à ence giustifiché chesta lingia aconsieda bele dant y aslum do les veles da l’auta ju. Ie ne creie nia a na lingia fata fora, ma dessegur él che la jent, i litadours, ne à nia sclut fora, ma mantegní la creta ai LADINS. Segur él che les listes y i conseiers se zera per n post de comand, de n poscibel vantaje, de souraventa personala y soziopolitica y no dessegur demé o dantaldut per l interes dla cossa publica. Enscí perd l’aministrazion de bones forzes y entant de stima da la jent bele dant scomencé a laoré.
Liams a les plates internet:
 Lista LADINS – Urtijëi – S. Cristina – Sëlva |
| Moviment Politich LADINS |
(0)Al ne me plej nia
(0)2 iadesc liet