Konrad Piazza preia perdonanza – La lista LADINS: “La Union di Ladins de Gherdeina ne dess nia dè ju la proprieté” y envieia la SVP a na enconteda
Les ones levedes su entourn la chestion dla Cësa di Ladins ne se apajeia nia plu via. Encuei à tout posizion l ombolt da Urtijei Konrad Piazza te na letra ortieda al foliet «Dolomiten », prian enchinamai perdenanza a inom di gherdeines dant a la jent de dut Südtirol y slomenan da l’autra pert dassen Willeit per avei tegnù su l bilanz provinzial per chesta gauja. La resposta dla Lista LADINS é riesc vegnuda do y tamben fiersa, l president dla Lista LADINS: “Che Piazza se enrabieia contra Willeit en cont dla Cësa di Ladins fej odei clermenter sia desconescenza di fac reai, sia posizion antiladina, sie desprijé dles comunanzes ledies y dles raprejentanzes y istituzions politiches legitimes. Tres de tel declarazions se descualificheia l prum zitadin enstes », refudan enscila les paroles dl ombolt desche « nia fair, zenza fundament y desprijentes ».
«Chi che conesc veramenter la situazion en cont dla derturazion dla Cesa di Ladins, sa che Carlo Willeit s’à engajè dal scomenciament inant con dutes sies forzes per ti assiguré a la Cesa di Ladins a Urtijei n contribut finanziar per mete man i laours nezessars de derturazion”, scriv la lista LADINS. Ala enjonta ence che fin a declarazion contrara “lieia l govern provinzial la desponibelté de dè ca n contribut finanziar a la zescion de na pert dla Cesa di Ladins, plu avisa chela che albergeia l Museum de Gherdeina”, “chesta ghiranza dla provinzia é n fat che degugn ne n’à enchin a sen trat zeruch”, végnel sotlinié. Mo “ghiré da la Union Ladins, na union che laora zenza fins lucratifs per l ben dla comunité sun l ciamp dla cultura y dl lingaz, la zescion de na pert dla proprieté, depierpul che impreises comerziales giata milions de euro de sostegn finanziar da la provinzia zenza ester sotmetudes a de tel condizions, ne é nia giustifiché”, scriv inant l president dla lista LADINS, dr. Giovanni Mischi. “La mendranza ladina dess avei l dert – sciche perauter les autres grupes etniches tla provinzia – de organisé autonomamenter sia vita culturala”.
Dl auter vers meina la lista Ladins ence fora segns de destenjion. Tres sie president ti àla ortié chisc dis na letra de envit a la SVP ladina “per se enconté danter forzes politiches ladines per se rejoné fora sun chestions olache les does forzes podessa avei ponc de convergenza a na moda de individué y envié via deberieda tl davegnì valch forma de colaurazion concreta” sciche an po lieje tla letra. La lista LADINS aspeta sen la resposta.
(0)Al ne me plej nia
(0)2 iadesc liet