Festa per i 50 agn dla Cesa di Ladins
Senta dla Union di Ladins de Gherdeina, dla Union Generela, dl Museum de Gherdeina, dla Usc di Ladins – na ciasa plena de ativités a ben de cultura y lingaz
Al é saurì da se imaginé la truepa storia, les truepes recordanzes con de vigni sort de emozions positives, ma ence les truepes persones che à laoré de volontariat o che é ence demé passedes tres un o l auter salament dla Cesa. Da auzé fora él ence la gran cumpeida de ativités culturales de vigni vers y les manifestazions popolares desferentes che é vegnudes metudes a jì sot a chest tet.
Poester nia duc sà che propi la Cesa di Ladins é istituzionalmenter anter les sentes plu vedles y emportantes per la cultura de Gherdeina y de duta la Ladinia. Al cleca pensé al Museum de Gherdeina, a la Biblioteca ladina, a la senta redazionala dla Usc di Ladins y dla Union Generala di Ladins dles Dolomites y samben a la Union di Ladins de Gherdeina. Ma ne desmention nia che te chesta Cesa fòvel zacan ence l studio radiofonich dla RAI Ladina olache bera Alex Moroder Rusina y bera Bruno Moroder de Fefa tolova su y taiova adum sies trasmiscions. Olache zacan fòvel n chino, olache la Lia de Teater de Urtijei fej ciamò aldidancuei la majera pert di teatri. Do cincanta agn de bon servisc é entratant la Cesa endò massa picera y da derturé su, i speron che les personalités politiches y les aministrazions publiches competentes nes deide inant per engrandì, mioré y ressané l frabicat, a na maniera che an possa endò laoré inant te na mioura cualité, ence con na majera lerch.
I volesse rengrazie y onoré i fondadours dla U.L.G y dla Cesa di Ladins y samben duc chi che à dagnora sostegnì y colaboré per l ben de nosta lia, cultura, identité y rejoneda ladina.
Egon Vinatzer
President dla Union di Ladins de Gherdeina
Program dla festa per i 50 agn dla Cesa di Ladins: 27-28-29 de agost 2004 | |
|---|---|
Vender, ai 27.08.2004 | |
| 19:30 | Salut dl president dla Union di Ladins de Gherdeina Egon Vinatzer y dles autorités (Konrad Piazza Ombolt de Urtijei, dot. Luis Durnwalder pres. dla Provinzia de Bulsan, dot. Florian Mussner ass. prov. per la cultura y les scoles ladines y per i laours publics, dot. Hugo Valentin president dl Istitut Ladin Micurà de Rü, dot. Nani Pellegrini president dla Union Generala di Ladins dla Dolomites, Cav. Ilda Pizzinini presidenta onorara dla Union Generala di Ladins dla Dolomites, Pauli Rabanser president dl grup de Teater de Urtijei, Deputat on. Bepe Detomas. |
| 19:50 | Referat: 50 agn storia dla Cesa di Ladins Reladours: Alex Moroder – Gilo Prugger – Robert Moroder |
| 20:20 | Paussa con renfresch (tla biblioteca) |
| 20:50 | Film de Ingrid Runggaldier y Walter Tomaset (35′) “La rejoneda tl cef” – Frida Piazza nes conta. |
| 21:30 | Conzert dla Familia da Pradac |
Sabeda, ai 28.08.2004 | |
| 10:00 | Daurida dla festa te verzon: bondì con mujiga de bona vueia, ceifs tradizionai y porta daverta tl Museum de Gherdeina, tla redazion dla USC y tla Biblioteca Ladina Al sona: |
Domenia, 29.08.2004 | |
| 09:00 | Santa Messa per ladin lieta dant da: (Sen. Vitalis Delago, sen. Cristl Moroder y Sen. August Prugger) L cor de gliejia de Urtijei cianta la Messa Ladina de Hansi Demetz de Sulé |
| 10:15 | Meisa torona con intervenc curc sun: l ladin gherdeina, sie svilup, sia adoranza Reladours: dot. David Lardschneider (adoranza de vigni di), dot. Lois Ellecosta ispetour per les scoles ladines dla Provinzia de Bulsan (l ladin te scola), dot.a Heidi Runggaldier Siller (livel de tueda scientifica), dot. Leander Moroder dir. dl Istitut cultural ladin Micurà de Rü (lessicografia), dot. a Ruth Bernardi (leteratura) Frida Piazza (scritoura y studieda dl ladin de Gherdeina). |
| 11:00 – 13:00 | Festa te verzon – al sona la Böhmische de Selva Da les 10:00 enchin a les 12:00 dantmesdì él porta daverta tl Museum y tla biblioteca. |
| 20:30 |  Tla gran sala Prejentazion dl CD “Gramofon”, Oldies per ladin. Tres la seira conduj Martina Rier. |
Entratant i trei dis él da vedei tl atrium na mostra de fotografies storiches sun la Cesa di Ladins. La Union di Ladins de Gherdeina embincia a dutes y a duc bona orela curta.
(0)Al ne me plej nia
(0)2 iadesc liet