Co che n strionet di Salvans á daidé la prinzessa dla luna
L spetacul teatral “Monti Pallidi” fej la roda ti meisc de messel y aost – Colaborazion anter artisc’ y joblers talians y ladins
En mertesc, ai 15 de messel 2003, da les 21.00 vegnirál prejenté sun plaza de gliejia a Al Plan de Mareo per l prum iade l spetacul teatral “I Monti Pallidi” (I Creps Sclauris) do l projet de Valentina Kastlunger, con toc rejonés sibe per talian che per ladin. A chesta premiera tolará pert la conesciuda autoura taliana Valentina Cortese. Per la gaujion vegnirál metú a jí na sfileda con ciavai y guces. L spetacul “Monti Pallidi” fajará spo la roda per les vals ladines y te valgunes localités de Puster.
L spetacul é vegnú realisé te na colaborazion strenta anter persones dl spetacul de desvalives pertes dla Talia y artisc´ dles valedes ladines. Per respidlé la realté dl luech é l spetacul vegnú realisé sibe per talian che per ladin che vegnirá rejonés depierpul. Per alesiré chest él vegnú chirí soluzions scialdi originales, zenza che al devente pesoch.
La liejenda “I Monti Pallidi/I Creps Sclauris” conta de n prinz tles Dolomites. Enceben che al vivova te n regn content y ligherzin, patéscel aboc empò dassen davia al sent na atrazion tres plu sterscia devers la luna. Al ruva chel dí che al é veramenter bon de mete pé sun la luna y ilò se inamoreiel dla prinzessa dla luna. Baudi é la luna tant blancia y la lum tant sterscia che na persona dla tera ne pò nia vive ilò zenza deventé tlaruveda vercia. La prinzessa dla luna ti va do a sie amour y vegn empera sun la tera, ma do da n struf végnela pieda da n encherscedum y per ne morí nia méssela jí derevers a ciasa sun la luna. Enscí é i enamorés endò despartis. Na soluzion al problem ti vegn piteda dal ré di salvans (na popolazion che rabesc ti bosc y viv ti andri). Sce al ti vegnirá permetú a sie popul de se aciasé tles Dolomites, adorará i salvans si strionec per tramudé les Dolomites te na tera olá che ence la prinzessa podará vive. L prinz é atira a una y i salvans entrecieia y tiesc i rais dla luna per formé na grandiscima teila sluminenta y cuer empera i creps y a chesta moda refleteiei de nuet na lum blancojina sciche chela lunara. Dilan a chest strionet pò la prinzessa endò vegnì ju da la luna y sté pro sie om sun la tera. Y al dess ester enzai chesta la gauja che i Creps Sclauris, (“Monti Palladi” per talian), é ruvés pro chest sclaier y colour demarevueia.
I colaboradours y realisadours dl spetacul
Projet: Valentina Kastlunger; test: Barbara Valli; lament de n prinz: Roberta Dapunt; testc dles cianties: Iaco Rigo; traduzions: Ulrike Frenademez; mujighes originales: Alessandro Trebo; direzion y esecuzion musicala: Christian Pescosta; joblers: Raimondo Brandi, Daria Castellini, Aram Kian, Bernardetta Nagler, Pietro Pilla, Giulia Valli; scenars, costums y grafica: Barbara Tavella, Claus Vittur; lumes: Benedetta Frigerio, Paolo Latini; organisazion: Licia Dragotto, Valentina Kastlunger, Taibon Romana; assistenza a la rejia: Erika Castlunger; rejia: Benedetta Frigerio, Valentina Kastlunger.
CALENDER i spetacui met man da les 21.00
(arsalf la replica a Vich de Fascia)
VAL BADIA
Salf manifestazions 22-7, 29-7, 5-8, 12-8
FASCIA
- Cianacei sun plaza 19-7
Soraga – Salf plurifunzional 25-7
Poza – Tendon manifestazions 2-8
- Vich – Gliejia de Santa Giuliana 14-8 N.B. da les 17.00
GHERDEINA
Selva – Paion 30-7
Urtijei – Salf congresc 1-8
FODOM
Reba – Salf manifestazions 10-8
PUSTER
Valdaura – Salf congresc 28-7, 7-8
Bornech – Court dl Ciastel 3-8
(0)Al ne me plej nia
(0)2 iadesc liet