L Pledari Grond sen ence on-line
L standard ladin-rumanc dla Svizra sen te internet con passa 200.000 paroles y terminologia spezifica – L standard ladin svizer é ofizial
Chisc dis él vegnù ciarié sun internet l Pledari Grond dl Rumantsch Grischun, l standard scrit ladin dla Svizra. Chest é gnù prejenté a la HIGA, sezion media dla “Tera Rumancia”. L Pledari Grond fova vegnù dé fora te na pruma edizion dl 1983, dal 2003 fòvel a la leta l CD-Rom y sen à la Lia Rumancia fat n auter vare inant l metan te internet a desposizion de duc y chel con bendebot de atualisazions y ampliamenc lessicografics. Al dess sostegní y enfortí la prejenza dl standard scrit ti Grijons.
Bendebot de endesfida fova la programazion y la prejentazion grafica dles 200.000 paroles a na moda che l resultat fossa l plu scempl poscibel per l utilisadour final. Desche la responsabla dl post de lingaz dla Lia Rumancia, Alice Dazzi, dij “se tràtel de n vocabular (pledari) dassen atualisé y con truepa terminologia nueva y tl spezifich, per fé n ejempl la terminologia gastronomica, nia dut déssen demé “cueje”, ma al é truepes formes per definì chest prozes”.
Al é da recordé che l Rumantsch Grischun é lingaz ofizial dl Cianton di Grijons y dla Confederazion Helvetica y che al vegn adoré amplamenter tla aministrazion, al contrar da chilò da nos, oláche al é vegnù “ilegalisé” tla aministrazion dl 2003 da pert dl assessorat ladin dla provinzia de Bulsan.
Liams a les plates internet:
(0)Al ne me plej nia
(0)1 iadesc liet