L inom sarà spo “Istituto Culturale Ladino delle Dolomiti Bellunesi

 

La chestion dl inom da dé al istitut cultural ladin, volù da la provinzia de Belun, ne podova nia passé sot al chiet dla politica

de Lorenzo Soratroi

Coche duc recorda, da pert de valgugn fòvel vegnù proponù che chest istitut se clame “ Istituto culturale ladino delle comunità dei ladini storici delle Dolomiti bellunesi“, n inom che ova descedé protestes, souradut per chel term, “storics”. Na definizion che trueps ova vedù sciche sforzeda, metuda ite, da na pert per cie che an essa enscì capì che zenza storia ne pòn nia ester na mendranza ( a cost de se la inventé) y da l’autra pert chela che ala é vegnuda interpreteda sciche na provocazion devers i trei comuns de Fodom, Col y Ampez.

Ma la chestion à abù vita curta. Ala é vegnuda descoruda fora tla ultima senteda dl consei provinzial de Belun. La proposta é vegnuda contesteda dal aconsiadour Iji Menardi “Malto”, a una con i autri aconsiadours de Forza Italia, ova ence damané che anter l auter  che duta la discuscion vegne sposteda a n’autra senteda. Nia de fat per chesta ultima proposta, ma chel che é plu  emportant per i trei comuns  é che l consei provinzial á trat demez l term “storici” y al à desmostré, almanco chest iade, de avei capì da cie pert che la mistificazion y la provocazion sun la chestion ladina vegn.
L inom sarà spo “Istituto Culturale Ladino delle Dolomiti Bellunesi”. Al resta tres da noté che n istitut cultural ladin à n inom talian. Ma sen ne podaràn nia plu fé confujion anter “storics” y neo – ladins.(if)

2 iadesc liet