Scì a la lista unida, y cialede cie che i on arjont te Fascia!
L assessour a les mendranzes dla region Luigi Chiocchetti (UAL) veid de bon uedl la costituzion dla lista unida Ladins-Jent Ladina Dolomites tla provinzia de Bulsan
Ence l conseier provinzial ladin de Trent y assessour regional a les mendranzes Luigi Chiocchetti é a una con la volonté de ti dé vita tla provinzia de Bulsan al moviment ladin nuef “Ladins – Jent Ladina Dolomites” metù a jì dai doi movimenc politics “Amisc dla Ladinia Unida” y “Ladins”.
Luigi Chiocchetti scriv che “chesta lista ladina nueva se prejentarà a les litazions provinziales de chest ann te Südtirol percie che i ladins de Gherdeina y de Badia sent l debujegn de avei sie raprejentant tl Consei provinzial: segn vif de democrazia, de vueia de tò pert, de se tò su n empegn tles istituzions provinziales. Per chesta rejon se à metù adum i doi movimenc, chel tradizional “Ladins” y chel nuef “Amisc dla Ladinia Unida”, nasciù per sostegnì i trei comuns dla provinzia de Belun en ocajion dl referendum de otober dl ann passé y che à metù a jì na soula lista ladina con l inom de “Ladins – Jent Ladina Dolomites” ma che mantegn i doi simboi y i doi inoms. De gran significat l fat che al ti sie vegnù damané ence a la UAL de Fascia de sostegnì chest moviment nuef che à desche obietif l’unité anter duc i ladins che viv tles trei provinzies de Bulsan, Trent y Belun, ajache demé metan adum les forzes él poscibel porté inant les domandes de duc i ladins che à laoré y che laora percie che l lingaz, la cultura y la storia ladina vegne portés inant a duc i liviei y te duc i ciamps.
Desche ladins de Fascia, donca, tegnonse su con forza chesta alianza nueva, ajache al se trata de n vare emportant envers pensiers y projec unitars di movimenc politics ladins dles comunités che viv dentourn l Sela te trei provinzies desvalives. N’autra poscibelté concreta sporta a la comunanza de Fascia per arjonje autonomamenter l’unité con i autri ladins zenza liams y resistenzes provinziales, vegn sporta da la reforma istituzionala metuda a jì tl Trentin y souradut dal comun general de Fascia che preveid n livel de autonomia organisativa y na poscibelté de autogovern che enfin a sen ne àn mai vedù autró y che ti consent ai ladins de Fascia de se dé ju ciamò plu concretamenter per chest obietif.
Aboncont él ence giust che duc i movimenc mantegne sia individualité y che al ne vegne nia fat na fujion anter i desvalifs movimenc ladins dles Dolomites, chest per ti dé ousc y interpretazion a la sensibelté de duc i teritores y di movimenc dles comunités ladines.
Chest moviment nuef é n segn emportant dé dai ladins envers la colaborazion, l dialogh y la vueia de se daidé un con l auter adoran na organisazion souraprovinziala y regionala per arjonje deberieda l’unité de duc i ladins dles Dolomites y per renforzé sie peis te na region che se troa tl zenter dl’Europa y che se carateriseia per potenzialités y ressurses culturales, materiales y umanes dassen granes. N segn de unité che ti darà ciamò plu forza a duc i ladins per podei arjonje y otegnì n stravardament gaiert, na valorisazion segura de sia identità y n svilup sozial che ae respet per la storia, l lingaz y la cultura de duc i ladins dles Dolomites.”
(0)Al ne me plej nia
(0)3 iadesc liet