Maroi y ampezans mesura endò sies forzes y sie slum
Seconda edizion di Juesc da Mont, chest ann ite a La Stua – En l ann passé ti l’ova sticheda i jugadours maroi sun Fodara Vedla
Te na colaborazion anter les assoziazions turistiches de Al Plan de Mareo y de Cortina d’Ampez végnel metù a jí en domenia, ai 18 de messel, da les 10,30 inant la seconda edizion di “Juesc da Mont”, chest ann sun Mont de La Stua t’Ampez tl Parch Natural dles Dolomites Ampezanes. Les scuadres marores y cheles ampezanes se mesurarà endò pro n clap de juesc che é valch moda liés al laour da paur. En l’ann passé ti l’ova sticheda sun Fodara Vedla i maroi tla classifica finala. Orela curta, beive y mangé sun l post.
I juesc
Tré n mocul (n toch de taia dl peis de za. 30 kg) che vegnirá sciolé dl lonch. I metri vegnirà cumpedés adum. La scuadra che abina adum plu metri davagna 1 n pont: 3 persones per scuadra.
Ciaré n lenzuel de fen, l “pico” per ampezan: a does concorentes eles ti tòchel de ciarié ite l fen te n lenzuel, n “pico” y chel a regola d’ert. L temp vegn cronometré. La scuadra plu asvelta davagnarà 1 n pont. 2 eles per scuadra.
Tré a la fun: juech a scuadres olache ampezans y maroi mesurarà sies forzes. 5 ponc. 5 oms stagns y gaierc a scuadra.
Les beles lavadesses: na scuadra de eles de 3 componentes mess sauté ju da ruf con condles, conduje su l’ega y emplení na sedla / brenta. Spo mésseles emblagné la blanciaria, daurí i grops y tene l guant sun les cordeles. L cronometer vegn fermé canche la ultima ciauza é sun corda. Chi che davagna giata 1 n pont. Scuadres de blot eles.
Sié na taia amesavia con na sia a man: na taia de bendebot de diameter vegnirà metuda sun n ciavalot y de doi messarài la sié amesavia con na sia da zacan. Chi che davagna giata 1 n pont. 2 ei per scuadra.
Taié via na taia amesavia con l manarin. Chi che fej plu aslum davagna y giata 1 n pont. 1 n om per scuadra
Mouje na vacia (savaieda, ure de guma!), 1 n jugadour a rode per scuadra. Chi che cliparà deplù lat te condla ti la sticarà. Trei jugadours per scuadra moujarà per doi menuc perom. Chi che davagna giata 1 n pont.
La Val de “Ra Stua o La Stüa desche an dij tla Val Badia” veduda da Fanes viaifora.
(0)Al ne me plej nia
(0)1 iadesc liet