Jouf dl Sela 1946

L obietif ne fova nia n mudl de jent sun jouf de Sela

AL É VEGNÙ ANALISÉ LA SITUAZION Y AN À FAT VALUTAZIONS POSITIVES DE COCHE L REFERENDUM A SOURAMONT À DESCEDÉ NA GAISSA NUEVA

de Riccardo Zanoner – vizepresident dla Generela

A lieje cie che é vegnù dit y scrit en cont dla scontreda sun Sela ai 21 de messel 2007, a recordanza de cie che al é sté storicamenter dl 1946, volessi dì doestrei robes per respone a certes oujes n pue massa critiches.



Al va debujegn de avei obietifs medems te duta la Ladinia – Cie funzion arà pa l organism de coordinament metù su dai ombolc?

La Generela saluda la enconteda di ombolc – y ala se met a disposizion per colaboré con i ombolc te chi ciamps damprò a si fins statutars

L Comun General de Fascia nasc da nuef – La comunité de Fascia clameda a se reje enstessa

Ladinia, al se deura na sajon nueva – La prospetiva de reunificazion ne pèr nia de sciaudé su plu che entant i cuers di ladins – La speculazion dl fabriché desceida cotan plu festide
1. l obietif dla Generela chest ann ne fova nia tant chel de porté sun Sela n mudl de jent; l obietif fova plutost chel de se enconté anter Generela, unions di Ladins de valeda con si militanc ladins per fé na reflescion deberieda, per scuté su, pareis, minonghes y ence problematiches che reverda la Ladinia de encuei, y apede souraldut per savei y entene zeche deplù y miec de cie che al é do a suzede via per i ladins da souramont, Cortina, Col y Fodom.
2. Ciamò apede la Generela à damané la prejenza di raprejentanc politics che é steda ence ben calificheda, per scuté su ence da sia pert na valutazion politich-istituzionala en cont di ladins y de sies problematiches, ence tl caje de coche an podessa les afronté sun l plan aministratif y istituzional:
3. Da me enfora chisc obietifs é vegnus arjonc enstadì: tla y pro la utia Salei él vegnù rejoné de nost lingaz, de nosta cultura, de nost teritore, de aspec economics y i on podù scuté su ence dl referendum che i ladins da souramont é do a endrezé, de coche ai à idea de se mueve y de coche ai à intenzion de jì inant souraldut fajan informazion y con mete belavisa en consapuda la jent.
4. I on fat valutazions positives de coche chest referendum à soscedé gaissa nueva ence ti ladins de nosta region, souraldut tres la creazion dl comité per la Ladinia Unida – Amisc dla Ladinia, y i on ence palesé duta nosta sodesfazion per la touta de posizion di ombolc dla Val Badia a favour dl Ladin Standard (desche Generela fajaronse n comunicat aposta olàche i volon ti sporje n apriejament ai ombolc de Badia ajache ai à desmostré de entene che al é avisa chest l troi per fé cioscé y conduje inant nost ladin tl davegnì, belavisa ence per daidé n svilup linguistich coerent y con basa scientifica di idioms de valeda).
5. Tl moment ofizial onse podù scuté su les minonghes da pert politica, Mussner (colaborazion), Chiocchetti (sostegnì dut cie che va envers a l’unité di ladins), Leo Bernard (L Comun General de Fascia pò deventé ence n puech l Comun General de duta la Ladinia y de duc i Ladins) y enscí inant…

Na scontreda donca che ne ova nia l obietif de “fé numer” ma plutost de fé na reflescion y de daidé pensé n mingol duc i ladins, nosta popolazion y nosc raprejentanc sun l troi olàche i son y olache i volon jì.

Te chest cheder à ence l president dla Generela fat prejent te sie discurs che “la planta ladina é a rise de secé” … n pensier donca che reverda duc canc, vigni ladin de vigni valeda é envié da se rende cont de chest, de se cialé daite y de se damané cie che al pò fé el enstes, te sie pice per l ben dla comunanza ladina entiera.

Develpai, l Vize-president dla UGLD
Riccardo Zanoner