Vito Pallabazzer é l prum president
Diretoura dl nuef Istitut Ladin é Paola Agostini – De setember jiràn tla Ciasa de Jan dertureda, senta dl Istitut a Col de Santa Lizia
L professour Vito Pallabazzer é l prum president dl Istitut Cultural Ladin “Cesa de Jan” a Col de Santa Lizia. Chesta é la dezijion dla endoneda di sozes fondadours, vuel dí les trei aministrazions comunales y les respetives Unions di Ladins de Fodom, d’Ampez y de Col, á tout en venders seira. Sie vize é Sandra Agostini, joena assessoura comunala de Col. Al consei nuef Istitut Ladin ti staràl permez n consei scientifich de sies componenc lités, doi per comun: Luciana Palla, Teresa Pezzei, Maria Sief, Dino Dibona, Stefano Lorenzi y Sergio Masarei. Col de Santa Lizia, l plajoul comun ladin plu a sud, con viadedò l Pelf.
Vito Pallabazzer é conesciù lonch y lerch per si studes linguistics, glotologics y etnografics. Al fova diretour dl Archivio per l’Alto Adige a Florenza y giaud anter esperc de ladinistica de dret n bon inom. Ence sce al à laoré te ambienc talians se destàchel clermenter da la scola de Padova de G.B. Pellegrini y da sies teories sun l ladin.
A chisc s’enjontaràl permez doi aconsiadours esterns y doi componenc de dert prevedus dal statut, respetivamenter l diretour dl Istitut Ladin Micurá de Rü, atualmenter Leander Moroder y l diretour dla Majon di Fascegn, atualmenter Fabio Chiocchetti. Chestes does strutures culturales che laora bele da soura doi diejenés tl ciamp cultural ladin ti á empermetù dut l sostegn al Istitut nuef da pié via. Plu inant litarà l consei scientifich sie president te sie gremo. L diretour dl Istitut fova bele vegnù enciarié y à tout su i laours, al se trata de Paola Agostini, ence ela da Col de Santa Lizia. Entratant ésen tl laour de derturé su la “Ciasa de Jan”, na ciasa storica tl paisc de Col y senta dl Istitut. I laours messessa vegnì ruvés tl meis de setember y la strutura podarà spo pié via con dutes sies funzions.
Al me plej
(0)Al ne me plej nia
(0) 1 iadesc liet
