Istitut Cesa de Jan: i dinés se ruva

L’Istitut Ladin “Cesa de Jan” manacia de messei saré

L Govern Prodi scurteia i mesums aloghés tres la lege 482/99 dl 50% ti agn che vegn – Istitut a les stremes

Empliés dl Istitut Ladin Cesa de Jan - Col Santa Lizia L’edema passeda é Luigi Chiocchetti ence stort pro tl Istitut cultural “Cesa de Jan”.Te chesta ocajion él vegnù informé dla strentura finanziara manaciousa dl Istitut. Ala se trata de renové l contrat de laour dl diretour y di doi empliés y de seguré ju sie laour tl Istitut. Al n’é nia dinés.

Al ti vegn ertsoura da ti cialé a la situazion finanziara. La direzion dl Istitut con empliés, l’assessour Chiocchetti y l’ombolt Paolo Frena

N RAI DE SPERANZA

Luigi Chiocchetti, assessour regional, à sen sclut ju sia raida. Al é sté tla Val Badia, te Gherdeina, via Col y n’Ampez. Al à audì autorités y raprejentanc de unions. Ala ne ciala nia fora cis bona. La tripartizion aministrativa arfera y fej dut plu rie.

Sceben che tla Ladinia él ben trei istituc ladins, doi de chisc laora bele da 30 agn encà, se féjei dassen ert de colaboré aldò de obietifs comuns. Vignun semena y sertla demé te sie verzon. Na speranza nueva é sen, desche Chiocchetti se aoda, la costituzion dla Lia di Comuns ladins che podessa porté inant ghiranzes y chestions a livel interladin, ti dan n endrez nuef ence ai istituc. Pro la radio y tv ladina vuel Fodom y Ampez finalmenter tó pert a plen titul y nia demé desche spetadours. Un n fat encorajent é segur: da Souramont y da Fascia ca ne màncel nia la volonté de laoré deberieda. Chiocchetti se prova dassen y al é da ti aodé plen suzes te sies intenzions. Al n’à degunes pregiudiziales envers la colaborazion interladina. (ji)

I finanziamenc aloghés tres la lege 482/99 vegnirà tres plu rers, ajache les alogazions metudes a desposizion vegn arbassedes damprovia dal govern Prodi, enfin al 2009 de ben le 50%. I raporc dl Istitut “Cesa de Jan” con la Provinzia de Belun ne n’é nience propi i miours. Al é ben veir che ultimamenter pòn lieje te na delibera dla Jonta provinziala de Belun che al vegn reconesciù ence l’Istitut “Cesa de Jan”. Enfin a sen vegnìvel demé reconesciù l’Istitut di neo-ladins, chel de Bourcia con sie diretour Ernesto Majoni. Che la provinzia de Belun ti mete plu averda a chest é dassen cler. Belun volessa samben che i doi istituc laorassa deberieda. Persona de referiment de entrami é l’assessour a la cultura y a les mendranzes linguistiches Daniele Larese Filon. Chiocchetti à podù conesce damprò la situazion economica dl Istitut, ma al à baudi messù recordé che i dinés dla region Trentin -Sudtirol ne pò nia jì soura i confins fora. Al à consié na miour colaborazion con i Istituc ladins tla region: la “Majon di fascegn” y l “Micurà de Rü”, ajache tres n valgugn projec deberieda podéssen fosc finanzié a valga maniera valch scomenciadives indiretamenter.

L president dla Cesa de Jan, Nani Pellegrini, dij che l’Istitut é finanziaramenter a les stremes y al chier dassen valch contribut nuef, zenza messaràl vegnì saré pro l’Istitut. Valch pice contribut ti vegn ben sport permez al Istitut da la Consulta ladina da Souramont, metuda adum dai ombolc de Ampez, Col y Fodom y da les Unions culturales, ma chisc ne cleca da soui nience per paié l personal che laora bele tl Istitut, de projec ne réjonen nience. Al messarà vegnì chirì d’autres fontanes, ence cheles europeiches y te chest vers ésen sen do a enjigné ca n projet da mané ite.

L medem dì s’à ence abiné da seira via n’Ampez la Consulta ladina di trei comuns da Souramont. Al manciova l’ombolt da Fodom, raprejenté perauter dal assessour a la cultura. La Consulta se damana de podei tó pert, apeina ch’al vegnirà slarié fora l Trail, a les trasmiscions ladines per almanco n pèr de minuc per podei mostré su sia partegnenza pro i ladins storics. Al é ence chilò vegnù rejoné di finanziamenc per la Cesa de Jan. Sclujan ju àn toché la chestion dl referendum per damané de ruvé pro Bulsan. Ma sun la chestion ésen stés dret zitesc, davia che an sà che al mess vegnì mudé ju n statut de autonomia a livel costituzional. La cossa mess vegnì enjigneda ca vare per vare, metan dret averda, ajache la popolazion n’é nia ciamò enjigneda al vare che ala dess dé. Entratant déssen avei tres de maiours contac anter les valedes ladines. Chisc contac pò sen vegnì realté ence tres la “Lia di comuns ladins” pernanche ala vegnirà aproveda da les provinzies y da la Region. Al mancia demé plu does adejions che vegnirà tost dedes ju. (ji)

Empliés dl Istitut Ladin Cesa de Jan

Foto: i conc ne stimeneia dut entourn nia.

Istitut Cesa de Jan: i dinés se ruva
Luigi Chiocchetti enconta i ladins da Souramont
Enconteda dla jonta regionala te Fascia

Al me plej

(0)Al ne me plej nia

(0)

1 iadesc liet

Ortiede inant tres