Dolores Dariz: la flama ladina ne s’à mai destudé

Dolores Dariz, candidata ladina sun la lista PD per les lites dla zité de BulsanDolores Dariz, candidata ladina sun la lista PD per les lites dla zité de Bulsan

Vos seis candidata per les lites dl comun de Bulsan. Vos seis bele steda conseliera comunala dal 2000 al 2005, louta sun la lista “Ladins”; ciuldì candideise pa sen sun la lista PD?
Al fossa dessegur sté bel de podei se prejenté con na lista ladina, ma l’organisazion fossa steda massa grana per me, per na maiour lista de candidac, 200 sotescrizions y dut l auter; perchel sonsi juda sun la lista PD desche candidata independenta. La lista à n program general che va ben ence per me y emplù me aspeti l sostegn dla lista.

Ciugn é pa i punc prinzipai de vost program sciche candidata ladina per l comun de Bulsan?

Per cie che reverda mie program tàchel adum con cie che i é fat fin a aldidancuei. Ie é laorè truep tl ciamp dl volontariat y dassen a cuer me sta i problems di joegn – da la formazion, al laour, a la ciasa – l’assistenza y la segureza dla jent atempeda y samben i problems di ladins. A la Consulta ladina dl comun de Bulsan vuei ti dè endò na sburla con ativitès y finanziamenc aldò. Dles lies ladines y di problems di ladins che viv y laora a Bulsan vuei samben ence me cruzié.

Dl 2004 scrivova signour Berto Videsott te n articul sun noeles.info: “Chela flama (ladina) mess endò vegnì empieda”. Chela flama s’à endere destudé daldut dl 2005; a cie moda pa?

Te me y te trueps d’autri ne s’à la flama ladina mai destudé, ma les lites é na gran gara con trueps scuoldi y truepa organisazion, na gara che i ladins combatus da vigni pert à messù perde dl 2005. Ma la roda pò ence se ouje.

„I son Dolores Dariz, ladina de Bulsan.  I son bele steda tl consei dl comun da Bulsan dal 2000 al 2005 per la lista “Ladins”. Ala me desplej che i ne é nia ciafié da mete su na mia lista Ladins y perchel me éi lascé mete sun la lista PD con chela che i son a una sun i punc fondametai dl program. I é dagnora dediché mies forzes a la comunité y i volesse l fé inant sciche conseliera dl comun da Bulsan. Tl uedl éi na maiour valivanza anter servisc soziai y enteresc economics, plu laour y la pruma ciasa per i joegn, servisc zenza barieres burocratiches, plu secureza, manco trafich, manco incuinament. 

Sono Dolores Dariz, ladina di Bolzano. Già consigliera comunale di Bolzano dal 2000-2005, per la lista ‘Ladins’. Purtroppo ho dovuto rinunciare a una lista propria Ladins e mi sono appoggiata come indipendente alla lista PD di cui condivido i punti programmatici essenziali. Mi sono da sempre dedicata ai problemi della comunità e vorrei continuare come consigliera comunale. Mi adopererò per un miglior equilibrio tra servizi sociali e interessi economici, per più lavoro per i giovani, per l’acquisto della prima casa, per l’accesso ai servizi senza impedimenti burocratici, per più sicurezza, per meno traffico e per meno inquinamento. La mia attenzione è rivolta anche al problema degli immigrati.

Ich bin Dolores Dariz, Ladinerin in Bozen. Schon Gemeinderätin der Stadt Bozen von 2000 bis 2005 für die Liste „Ladins“. Leider musste ich auf eine eigene Liste Ladins verzichten und mich an die Liste PD, deren Grundprogrammpunkte ich teile, anlehnen. Ich habe mich immer den Anliegen der Gemeinschaft gewidmet und möchte es als Gemeinderätin weiter tun. Sorge tragen werde ich für mehr Ausgleich zwischen Sozialdiensten und wirtschaftlichen Interessen, für mehr Arbeit für die Jugend, für den Zugang zur ersten Wohnung, für den Zutritt an die Dienste ohne bürokratische Hindernisse, für mehr Sicherheit, für weniger Verkehr und weniger Umweltverschmutzung. Meine Aufmerksamkeit gilt auch den Einwanderern.“

Co fova pa la situazion politica di ladins chi agn a Bulsan? Podeise nes conté en curt cie che i ladins ova laouta arjont y co che ala sta encuei?

Dessegur fòvel i agn 2000 na gran vueia de ester y de se fé valei desche ladins y desche terz grup linguistich a Bulsan y tla Provinzia. Nos ovan trueps che daidova ma samben ence n valgugn decontra. Empò onse podù laoré con legreza y suzes. La maiour sodisfazion é steda chela de rompe l mur contra l lingaz y l proporz con valch inoms y valch posć de laour te comun de Bulsan. La ciasa per studenc y laoranc ladins tla via Roma onse ence arjont y la Consulta ladina à podù fé treupes y de beles manifestazions. Do n pez n puech plu chiet él sen endò plù vita tla Comunanza ladina, union che lieia adum duc i ladins da Bulsan.

Tl comun de Bulsan vìvel y laòrel encuei cotant de ladins da dutes les valedes. Se tràtel de na comunité omogenea con i medems enteresc o resta vignun taché a sia valeda y eventulamenter a sia provinzia de origin?

I ladins a Bulsan é na comunité omogenea. Al ne é mai vegnù desferenzié anter chisc y chi ladins, da pert di ladins entesc almanco. Cler che les divijions politiches di ultims temps – dai lingac ai ejams, ai statuc – ne ti à joé a degugn. Per fortuna onse ciamò na RAI, na Usc, na Comunanza per duc.

Tant grana rateise pa la chance de vegnì liteda tl consei comunal y tant de oujes adoreise pa per ruvé ite? Bàstel les oujes di ladins o jeise ence a chirì oujes pro i todesc y i talians?

Con l aiut di ladins, con chel dla lista y samben ence con les oujes de talians y todesc speri de vegnì liteda. Te vigni caje vuei arjonje n bon resultat.

Co é pa i raporc anter ladins, todesc y talians a Bulsan? Se conèscei, se végnei, ài contac o viv vignun sclut ite te sia comunité ?

L raport di ladins con i talians y i todesc é per natura bon. Dessegur taca vignun pro sia tradizion culturala y ne tol nia dagnora pert a les manifestazions di autri. Ma i on deplù ejempli olache talians y todesc tol ence pert a la vita soziala y culturala di ladins, sciche l Aperitif ladin y la Comunanza enstessa.

Tl “Memorandum ladin” vègnel ghiré che l lingaz ladin, y plu avisa l ladin scrit unifiché, vegne adoré deplù a Bulsan ciuldiche capitala de dutes trei les comunités linguistiches de Südtirol. Tant realistica rateise pa vos chesta ghiranza?

Per cie che reverda l comun de Bulsan pòl dessegur adoré l ladin unifiché, ma l’adoranza ofiziala dl ladin unifiché rati ie che mess pié via da la Provinzia y da les valedes ladines.

La Comunanza ladina a Bulsan se cruzia encuei scialdi demé de ativités culturales y de temp lede. Rateise vos che ala dess ence se cruzié de chestions politiches?

La Comunanza é na lia culturala y si prum compit é chel de fé ativité culturala y cie che é prevedù ti fins de sie statut. Al é cler che al ti en va ence dla politica culturala, che ala messarà proé de coordiné con les autres lies culturales ladines y con les raprejentanzes politiches.

Al me plej(6)Al ne me plej nia(0)

870 iadesc liet

Ortiede inant tres

2 comentars a revert de "Dolores Dariz: la flama ladina ne s’à mai destudé"

  1. Marina Crazzolara | 30/04/2016 da les 11:40 | Respone

    I se aodi dűt l bun por les lites comunales de Balsan.
    Marina Crazzolara

    Al me plej(1)Al ne me plej nia(0)
  2. Erwin Valentini | 11/05/2016 da les 11:18 | Respone

    La flama ladina se à destudé na seconda outa a Bulsan. Chela flama se fova empieda, i agn 1978/79 con la fondazion dla Comunanza ladina a Bulsan y spo dl moviment politich “Ladins” che ova mané n sie raprejentant tamben tl consei comunal che tl consei provinzial de Bulsan. Doris Dariz, che fova bele steda conseliera comunala dal 2000 al 2005, à prové de empié chela flama con l aiut dl PD ma l tentatif é jù a vuet; les 48 oujes che ala à abiné adum ne ti à nia davert la porta dl consei de comun de Bulsan. Iaco Rigo se damana sun La Usc: Ola é pa i ladins? I ne sé nia tant de ladins che viv y pò lité a Bulsan ma dessegur n valgugn cenc: assé per abiné n scagn tl consei de comun. Ma i ladins ne se à nia lascé audì, ne ti à nia dé la ousc a la unica candidata ladina; les 48 oujes che Doris à giaté ne é plu dessegur nience dutes ladines.
    La Comunanza ladina se lascia ad entene vigni tant con valch manifestazion sozio-culturala “ladina” - messes, jites, cursc, encontedes de orela curta - ma politicamenter é i ladins a Bulsan morc fora. Bele dl 2004 se baudiova signour Berto Videsott che “la discuscion politica se ova destudé”, encuei chìr i ladins l’aorela curta, panem et circenses, deplù ne adòrei nia, la politica ti ài bele da n pez sourandé ad autri, almanco a Bulsan.

    Al me plej(1)Al ne me plej nia(0)

Scrive n comentar

La miscion e-mail ne gnirà nia publicheda.


*