Noeles.info

Tres la intervista tla Dolomiten de Lori Senoner Mussner, membra ladina dl diretif, à i "Freiheitlichen" metù man da tré ju sia "maschera" en cont de sia politica ladina. Cie che conta pro i ladins aclapés ti Freiheitlichen pèrel che sie dantaldut de ester "Deutsch gesinnt".

Nia demé chel, ma Lori Senoner se à ence tout a dì che "Ladins Dolomites" é "Italienisch gesinnt", aladò dl schema nazi-fascist dl temp dles opzions sciche Carlo Willeit à descrit endertura. Ciunes che é les gaujes messessa perdret Lori Senoner splighé. Nia demarevueia che chest encadrament politich de stamp dles opzions nazi-fascistes ti à fat vegnì stome al president de Ladins Dolomites. Albert Pizzinini à dit che les esternazions di Freiheitlichen en cont de sie encadrament te "Deutsch gesinnt" y "Italienisch gesinnt" é de "estremism de man dreta y mirés a la despartizion di ladins". Chestes paroles ti à basté ai Freiheitlichen per manacé Albert Pizzinini y l medium che à publiché chesta touta de posizion enfinamai con na plura. Nia demé chel: ai à metù en discuscion sie laour te scola y ghiré sia destouta. La chestion vegn raideda tant sotissoura che a mete man con les "Hasstiraden" (blastemes de senn) déssel ester sté el, deguna parola plu dles esternazions de Lori Senoner Mussner che à metù a jì dut cant con sia classificazion di ladins te "Deutsch gesinnt" y te "Italienisch gesinnt" (Ladins Dolomites auda aladò de ela pro chisc ultims), na categorisazion dassen festidienta che recorda belavisa i temps dles opzions che - desche la storia nes ensegna - ne ti lascia nia plu lerch ai "ladins" zenza enjontes.

Belavisa "Amisc dla Ladinia Unida" à dal scomenciament encà metù gran peis sun la storia tiroleisa di ladins, rejoné con politics tiroleisc y abù l sostegn di scizeri y de Pius Leitner. Per Lori Senoner Mussner ései endere "zu italienisch". Cie suzédel pa perdret con i "Freiheitlichen" ladins?

Chest a pert, ova propi la componenta di Amisc dla Ladinia Unida porté ite dret clermenter l aspet tiroleis tla chestion dl referendum da souramont y tla campagna litala. Candidat de piza fova Pepi Dejaco, ex-esponent Svp. Perauter fova ence la Lista Ladins juda ite na alianza litala dl 1998 con la "Demokratische Partei" (todescia). Coche Lori Senoner ruva a de tel conclujions romagn n mistere enfin a che i Freiheitlichen ne desclaresc nia sia posizion.
Lois Taibon, raprejentant te Mareo ti Freiheitlichen, la veid depierpul enscì en cont de estremisms de man dreta al intern di "Freiheitlichen": "De tel contejes é baujies fosces, che nos ne volon y i ne podon nia plu ben die lascé suzede" y che "Albert Pizzinini adora n lingaz che va soura les bones manieres fora".

Albert Pizzinini: "Ladins Dolomites ne se lascia nia sprigolé y intimidé con manacedes de plures. L valour democratich é n valour fondamental y la liberté de minonga auda laprò. Sce certes declarazions ne ti scusa nia massa ai "Freiheitlichen" méssei mefun desmostré con i fac che ales ne stimeneia nia. Ma la reazion desmostra che la liberté de opinion vegn demé entenuda dai "Freiheitlichen" per sies minonghes. Chi che se permet da critiché tres dut y dut cant mess mefun ence azeté valch outes valch critica. Almanco te na democrazia."

Per cie che reverda la "politica ladina" di Freiheitlichen se limiteien a dì cosses en general: valours di antenac, amour al lingaz y tradizions y e.i. te formulazions dassen tourbles, nia de concret. Deguna touta de posizion ofiziala ne él dutaorela per cie che reverda p.ej. agregazion di trei comuns ladins da souramont, ladin unifiché scrit, ladin te scola, proporz, y e.i. De dut chest ne afùstien net nia. Sun chestes chestions vegniràl endere mesuré la bonté dla politica di "Freiheitlichen".