Na lignora de 9 referac per sclarì la situazion
Le Consëi dla Regiun Trentin-Südtirol mët a jí deboriada cun l’Assessorat por la scola y la cultura ladina le convëgn “I ladins, na mendranza tla mendranza”. In vëindres, ai 22 de novëmber, dales 9 dadoman ales 17 dômisdé tl salf dl Consëi dla Regiun Trentin-Südtirol, tl Palaz provinzial, tla strada Crispi 6 a Balsan.
Le program por dl dé vëiga danfora impröma deplü parores de salüt da pert dl president dl Consëi regional Franz Pahl, dl presidënt dla Junta provinziala Luis Durnwalder, dl assessur ladin Florian Mussner, dl vizepresidënt dla Regiun Carlo Willeit, dl presidënt dl Istitut Ladin “Micurà de Rü” Hugo Valentin, dl vizepresidënt dl Istitut europeich dl Université de Turic Anton Killias y inultima dl professur universitar y diretur dl CIFEM Albert F. Reiterer.
Ara va spo inant cun na lignora de referac: “Le ladin dal punt de odüda linguistich”, é le tema dl pröm referat tigní da Lois Craffonara.
L’avocat Christoph Perathoner fajarà spo conscideraziuns storiches, politologiches y iuridiches sön la “Defendura dla mendranza ladina te Südtirol”, deperpo che l’avocat Roland Riz analisarà la “Chestiun ladina tl dërt costituzional”.
Le deputat y avocat Beppe Detomas jarà ite sön la “Sconanza dla mendranza ladina tl Trentin y tl Venet”.
“Les fundamëntes dl dërt linguistich dla Svizra tignon cunt dl retoroman”, sarà le referat dil professur universitar Daniel Thürer.
Co che ala sta tla pratica politica gnarà splighé dal deputat tla Ciamena Siegfried Brugger cun le referat: “La sconanza dles mendranzes dal punt de odüda dl Parlament talian”.
Do la pausa de misdé sarál dales 15 le professur universitar Peter Hilpold che baiarà sura “La sconanza tres le dërt internazional”.
Le professur Paolo Carrozza spligarà spo la situaziun dles “Mendranzes stersces y de chëres debles tl ordinament iuridich talian” denant co stlüje jö cun Theo Rifesser che jarà ite sön la situaziun dla “Scola ladina te Südtirol”. Incër les 17 él söl program ciamò na cörta descusciun y analisa finala dl dé. (Fontana: OSP/EB).
(0)Al ne me plej nia
(0)2 iadesc liet