Sia mort premaduda à scomuet duta la valeda
Carlo é nasciü a Rina, söl lüch dl Prestier, ai 3 de merz dl 1946, te na familia de diesc fredesc y sorus. Al é chersciü sö tla coa scëmpla y cialdina de süa familia, cossa che ti à dessigü dè le stamp por düta süa vita, caraterisada dala bona löna y dala comprensciun por i bojëgns di atri.
Al à spo fat sü agn de formaziun a Rina, Maran, Viena, Padova-Desproch, olàche al s’à fat na bona fondamënta de preparaziun por süa profesciun da insegnant.
L’ann 1972 él rovè a La Ila tla Scola Mesana olache al à insegnè todësch y storia fina al 1997. L’ann 1997/98 à Carlo surantut la inciaria da diretur dla Scola Mesana da San Martin y Al Plan, dal ann de scola 1998/99 al 2001 él stè diretur dla Scola Mesana da La Ila y tl ann 2001/2002 diretur dla direziun raionala dles scoles ladines a Badia. Süa vijiun da educadù, maester y diretur fô caraterisada da na gran crëta y da n gran respet te vigni scolar, y da en bel raport cun i compagns de laûr.
L’ann 1976 s’à Carlo Pallestrong maridé cun Emma Valentini da La Ila, y deboriada jêi spo a surantó la gestiun dla Ciasa Tamà. Da chësta uniun él nasciü trëi mituns: Tania, Nadia y Damian. Carlo à dediché tröpes de sües forzes y de sües cualitês por le bëgn dla comunitè sciöche ciantarin pro le Cor de Dlijia, sciöche musiconter dla Müjiga, sciöche aconsiadù de Comun, sciöche mëmber y Presidënt dl Consëi de Cöra, sciöche Presidënt dla biblioteca de val a Pedraces. Püch dan che l’ann de scola 2001/2002 se rovass, s’à Carlo amarè. Al à afrontè chësta situaziun nöia cun gran serenitè, cun na gran vöia y speranza de varì. Mo in lünesc, ai 18 de novëmber gnôl lascè al savëi che Carlo é mort. La mort de Carlo à fat na gran impresciun tla popolaziun y dala sopoltüra in jöbia domisdé à na gran fola de jënt desmostrè süa stima por ël, sciöche pere y om de familia, sciöche insegnant y diretur, mo iö pënsi dandadöt sciöche porsona valënta y da orëi bun.
Dr. Lois Castlunger
N lecort de Carlo Pallestrong.
Carlo Pallestrong à laurà giut coche nseniant de materies leterères tla scola mesana y diretëur, dant dla scola mesana da La Ila y ultimamënter dla Diretzion Raionela dla Alta Badia a S. Linèrt.
Ël à dat sëuraprò n gran contribut ala chemunanza de Badia, sibe te chemun che nce te truepa lìes cultureles de si paesc.
L lecurdon coche na persona de scola dassën scrupulëusa y tacheda a si lëur. Da diretëur al desmustrà de savëi scuté su i nsenianc y duc si culaburadëures a na maniera collegiala y davierta. Dut ntëur se àl purvà tla inovazion pedagogica y metodologica per purté inant la scola ti tëmpes da aldidancuei.
Ulon ti sentì grà de dut chël che l à fat per la scola ladina, ël lascerà segurmënter na gran locia danter chëi che l à cunesciù y à laurà cun ël.
L Intendënt
Dr. Roland Verra
(0)Al ne me plej nia
(0)1 iadesc liet