La plaia dl acohol y les terapies
de Castlunger Lois
In domënia, ai 26. de jenà, gnaràl tignì tla Ciasa Runcher a Badia dales 15.00 ales 18.00 la reuniun generala dl’APCAT (l’Associaziun Provinziala di Clubs di Alcolisc’ in tratamënt). La colauraziun danter istituziuns publiches sciöche le sorvisc por les dependënzes, le zënter de Alcologia a Bad Bachgart, scoles, doturs de basa, spitol y d’atri y nosta assoziaziun di alcolisc’ sarà le tema prinzipal. Chësc ne n’ô nia dì che al ne sides nia sté fina sëgn colauraziun. Ara se trata plülere de ciafè formes nöies, concretes y continuatives de colauraziun.
Söl retrat: L’Prof. Vladimir Hudolin y Costante Valentini
- Chësta ota metunse indô man de organisè en curs de sensibilisaziun ai problems coliá al alcohol. La motivaziun por chësc curs à dui aspec:
1. informè y sensibilisè la jënt y la formaziun y preparaziun de sorvidus dl club (porsones che surantol n club) y cherié, adüm cun d’atres istituziuns y assoziaziuns, na cultura nöia de fà festa.
2. nos aratun ince dër important che i clubs de düt Südtirol ais en pêr de iadi al ann l’ocajiun de se incuntè por se conësce damì y se dé insciö coraje un cun l’ater.
Chëstes aziuns à na gran importanza, mo la fondamënta de nosc laûr romagn inant le medem: se incuntè vigni edema por n’ora y mesa de terapia por afrontè i problems dl alcohol y porvè da vire na vita nöia de solidarieté, de sinceritè, de ligrëza y de coraje.
La reuniun generala é daverta a düc che che ô s’informè sön problems dl alcohol y sciöche an po ti jì pormez a chisc problems
(0)Al ne me plej nia
(0)2 iadesc liet