Grijons: problems finanziars pro La Quotidiana

 

La Agentura da Novitads Rumantscha vuel salvé “La Quotidiana” – La man publica dess daidé deplù

Les relazions danter i ladins dles Dolomites y i ladins ti Grijons é deventedes ti ultims agn y diejens majeres y importantes, dantaldut per la Ladinia olache i Grijons vel sciche n ejempl. I impulsc vegnus dai Grijons é cotanc: i programs basa per elaboré dizionars ti Istituc y l plu eminent, l pere dl RG é ence l pere dl Ladin standard, l dr. Heinrich Schmid y e.i.Trueps ti ciala a les trasmiscions rumances tla televijion y valch un ascouta su ence l radio. Y sce ceze ne funzioneia nia ti Grijons se stan ence ert tla Ladinia. Enscì à sprigolé la noela che la Quotidiana, l foliet dl dì ti Grijons, é ruvé te dificoltés. Trei redadours é vegnus relascés dal servisc pro la Quotidiana per gauja de problems finanziars y per mancianza de abonés assé tles regions dl Surmeir y dla Engiadina. La “Agentura da Novitads Rumantscha” (ANR) dess vegnì amplieda y restrutureda.

Per capì miec la cossa él da recordé che “La Quotidiana” vegn deda fora da la Ciasa Editura “Südostschweiz AG”, en curt SO, che dà  fora desvalifs foliec todesc. La “Agentura da Novitads Rumantscha” (che laoura per tv-radio y foliec rumanc) sporj permez articui y cuer enscì na pert dl contegnù de “La Quotidiana”, ma 9 articui al dì o 2 plates, enscì mesanamenter, reclameia la SO, é massa puech per alimenté n foliet da vigni dì. Aldò dla SO messessa la ANR almanco sporje permez da 8 enchin a 10 plates al dì. Per gauja de chestes dificoltés ròdel enchinamai sen la proposta de jì endò zeruch a n foliet a l’edema.

A la fin de jené à La “Agentura da Novitads Rumantscha” tout posizion: ala é dla minonga che n foliet da vigni dì é nezesciar per renforzé l’identité y l’unité di rumanc. Ala se engajarà con dutes sies forzes per che sia contribuzion redazionala vegne deslarieda y damanarà n sostegn finanziar suplementar al Cianton Grijon y a la Confederazion. Na dezijion definitiva dess vegnì touta devers la fin d’auril 2003. Dui redadours relascés da la Quotidiana é entratant bele vegnus sourantouc da la ANR y daidarà enscì a tegnì inant en pé l foliet.

2 iadesc liet